GISUGAT ang kabuntagon sa mga molupyo sa Barangay Mahayag, Bunawan, dakbayan sa Davao og pinusilay tali sa kapulisan ug armadong pinangita sa balaod Sabado, Septyembre 14 ning tuiga.
Gikanayon nga duha ka lalaki ang nakigpinusilay sa mga sakop sa Bunawan Police Station kon diin usa kanila napatay samtang ang usa nadakpan.
Apan usa sab ka sakop sa Bunawan PNP ang samdan human nga gipusil sa usa sa mga suspek sa dihang dakpon na unta.
Sa report, nasayran nga alas 8:30 sa buntag, Sabado, nakadawat og impormasyon ang kapulisan nga nasiplatan ang usa ka Basilio Monteroso Abrigoso, 46, taga Piatos, San Isidro, Davao City,
Si Abrigoso dunay warrant of arrest sa kasong homicide nga giisyu ni Judge Ronald S. Tolentino sa Regional Trial Court 11 Branch 52.
Suma pa human madawat ang impormasyon nga nasiplatan si Abrigoso sa Mahayag kinsa padulong sa Sta. Cruz, Buhangin aron nga mamista, nilihok dayon ang kapulisan ug nimuntar og checkpoint, pagpanguna ni PMAJ Noel Villahermosa sa may Liloan, Mayahag, Davao City nga gituohang agian sa suspek.
Sa dihang molabay na unta si Abrigoso sa maong dapit, nakurat kini sa presensiya sa kapulisan hinungdan nga milikay ug sa pagdinali-dali nahug sa kanal ang gisakyan nga motorsiklo, angkas ang lain pang kauban.
Daling giduol sila sa mga pulis Bunawan PNP, apan imbis nga moampo, si Abrigoso nagpusil kanila hinungdan sa pagka-igo ni Police Corporal Joel Villegas.
Mga suspek daling nisibat, samtang si Villegas gidala ngadto sa Southern Philippines Medical Center (SPMC).
Sa follow-up operation, unang nasignit ang kauban ni Abrigoso nga si Rogelio Monteroso Abrigoso, 49, taga Purok 3, Maranding, San Isidro, Davao City.
Samtang laing tim sa kapulisan, padayong migukod kang Basilio nga nitago sa usa ka abandonadong balay.
Nakigpinusilay pa siya sa kapulisan, apan demalas lamang tungod siya ang nakorner ug napatay.
Sa pagpanubay sa Scene of the Crime Operatives, nakuha gikan sa napatay ang usa ka armas nga Armscor .45 caliber ug mga bala.
Patay’ng lawas gidala ngadto sa Rivera Funeral Homes samtang ang dinakpan anaa nas kustodiya sa kapulisan.
Samtang mismong si Davao City Police Office director Police Colonel Alexander Tagum ang nibisita sa samaron nga pulis.
Sumala ni Tagum nga operahanan na si Villegas sakop sa Bunawan PNP kinsa nakahiagom og mga samad pinusilan sa nagkadaiyang bahin sa lawas.
Gibutyag ni Bunawan Station Commander Police Major Noel Villahermosa nga atol sa checkpoint wa mihunong ang mga suspek.