SUPERBALITA CEBU

3 ka tawo gipusil patay

(Tampo nga hulagway)

Tulo ka mga tawo ang gipamusil patay sa managlahing mga oras ug dapit sa Siyudad sa Lapu-Lapu ug Dakbayan sa Sugbo sa Sabado sa kaadlawon, Septiyembre 14, 2019.

Gipamatay naglakip sa giingong sakop sa usa ka fraternity, maestro ug waiter.

Naputos sa mga samad pinusilan ang usa ka sakop sa Tau Gamma Phi Fraternity human pusila sa 10 ka armadong mga tawo sulod sa iyang kwarto sa iyang balay sa B. Aranas Extention, Barangay Duljo Fatima, Dakbayan sa Sugbo.

Si P/Msgt. Nicolo Gonzales, imbestigador sa Mambaling Police Station, niila sa biktima nga si Jake Aleman, 32.

Matod pa ni Gonzales nga pasado alas 3 sa Sabado sa kadlawon, samtang nahinanok si Jake, giingong gisulod sa gibana-banang 10 ka mga armadong kalalakin-an nga sakay sa duha ka mga sakyanan ang iyang balay. Pulos nagtaptap ang mga gunman.

“Actually mao na ang giingon sa amahan sa pagkuha namo sa mga detalye apan sa among imbestigasyon, amo gyud ni palawman,”matod ni Gonzales.

Dugang pa ni Gonzales nga padayon pa ang ilang pagkuha sa mga detalye sa hitabo aron mailhan ang killers.

Nasayran usab sa kapulisan gikan amahan ni Jake nga sakop ang iyang anak sa Tau Gamma Phi Fraternity.

Apan nagtuo si Gonzales nga walay kalambigitan sa frat ang kamatayon ni Jake.

Nakuha sa Scene of Crime Operation ang di mominus walo ka mga bala sa wa pa matino nga armas sulod sa kwarto ni Jake.

UNSAY NAHITABO?

Ang amahan ni Jake nga si Oscar, sa pakighinabi sa Superbalita Cebu, nitug-an nga base sa mga estorya sa ilang mga silingan, niabot ang duha ka mga sakyanan, kansang mga sakay pulos nagtaptap.

Daling gipahapa ang mga tawo sa gawas sa balay ni Jake aron dali silang makasulod.

Dugang pa ni Oscar nga nakadungog siya og mga tunob sa gawas ug sa dihang iyang gilili gikan sa bentana, iyang nadunggan ang mga buto sa armas. “Wala na ko mogawas kay og mogawas ko, basin apilon hinun ko og patay sa mipatay sa akong anak,” tug-an ni Oscar sa Superbalita Cebu.

Di masabot ang iyang gibati sa dihang iyang nadunggan ang mga buto buto sa armas gikan sa balay sa iyang anak nga tupad ra sa ilaha. Ang balay ni Jake naa sa atubangan sa balay sa iyang ginikanan.

“Wala koy mahimo bisan pa nga kanhi ko sundalo. Mibati ko og kahadlok sa maong panghitabo,” dugang ni Oscar.

Gisaysay niya nga duna silay gidudahan kinsa ang ningpatay sa iyang anak apan wa na siya mohatag pag detalye.

Matod niya nga wa siyay nadunggan nga si Jake dunay nakontra sa grupo nga iyang giapilan, bisan sa ilang dapit.

Si Jake buwag sa iyang kapuyo ug dunay tulo ka mga anak samtang ikatulo usab sa upat ka mga magsuon.

Siya usa ka computer technician ug dunay negosyo nga mga tubigan nga huloghulog piso sa ilang dapit ug mga kasikbit nga barangay.

Hustisya ang gipangayo niya sa pagpatay sa iyang anak.

MAESTRO GIPATAY

Patay ang usa ka magtutudlo sa Pajac Daycare Center atol sa pagpamusil sa Barangay Pajac, Dakbayan sa Lapu-Lapu pasado ala 1 sa Sabado sa kaadlawon, Septyembre 14.

Ang biktima giilang si Benjamin Rosalejos Rosales, 43, lumolupyo sa usa ka village sa nahisgotang dapit.

Matod ni Police Captain Narciso Abapo, hepe sa Mactan Police Station sa Lapu-Lapu City Police Office, nga base sa ilang imbestigasyon, natulog na unta si Rosales sa iyang pinuy-anan.

Apan nibangon kini sa iyang higdaanan ug migawas sa balay human makadungog og usig sa iro.

Sunod na lang nga nadungog sa iyaan niining nailhang si Prima Rosales mao ang buto-buto sa armas de fuego ug nahagba na ang biktima.

Tulo ka mga gunman ang giingong nakit-ang namusil.

Sa inisyal nga pakisusi sa background ni Rosales, nasuta nga aktibo kini nga tigsumbong sa kapulisan sa mahibaw-an niining mga binuang ug ilegal nga kalihukan sa ilang dapit.

“Padayon pa karon ang amo investigation. Pero kani man gud siya ganahan gyud ni mohatag og info, motabang gyud ba isip public servant kay teacher lagi,” matod ni Abapo.

GIPALUHOD UNA GIPATAY

Nianang pasado alas 3 sa kadlawon, laing tawo usab ang gipusil patay sa Sitio Mahayahay, Brgy. Bankal, dakbayan sa Lapu-Lapu diin ang biktima nailang si France Almeria ,19, lumolupyo usab sa nahisgotang dapit.

Si Almeria giingong usa ka waiter sa usa ka kan-anan ug padulong nang mopauli uban ang iyang hinigugma luwan sa motorsiklo dihang nahitabo ang pagpamusil.

Giingong gisundan sila si Almeria sa mga lalakeng nakataptap sa ilang nawong ug nag motorsiklo. Sila gipakanog sa iyang gimanehong motorsiklo human maka-overtake ang mga gunman.

Human niini, gipaluhod kini ug gipusil apan wala ra giapil ang hinigugma niini.

Matod ni Police Major Jaime Tolentino, hepe sa Pusok Police Station, ila karong gitan-aw ang posibilidad nga personal grudge o ba kaha fraternity-related ang pagpusil patay sa biktima.

Apan gibutyag usab ni Tolentino nga si Almeria suspek sa kaso sa pagpanulis sa usa ka call center agent sa miaging tuig.

Samad pinusilan sa nagkadaiyang bahin sa lawas ang naangkon ni Almeria gikan sa gituohang kalibre .45 nga armas de fuego.

“Amo pa ni tan-awon gyud pero basin frat kay batan-on man gud ning biktima. Unya grabeng kalagot gyud ang gunman ani kay gisiguro man gyud siyang patyon,” matod ni Tolentino.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph