GIAYO nga parte sa taytayan sa Mananga sa Dakbayan sa Talisay maagian na sa mga sakyanan.
Alas 8:40 Sabado sa buntag, Septiyembre 14, gibuksan ang parte sa taytayan nga giayo sulod na sa usa ka tuig.
Ang mga sakyanan nga gikan sa habagatan sa probinsya sa Sugbo padung sa Siyudad sa Sugbo di na kinahanglan pa nga makig-share sa pikas nga bahin sa taytayan.
Sulod sa kapin usa ka tuig nga ang parte sa taytayan sa Mananga nga alang unta sa mga sakyanan nga gikan sa amihanan nga bahin, padung sa habagatan, ang gigamit isip two-way.
Gitug-an ni City of Talisay Traffic Operations and Development Authority (CT-TODA) head, Jonathan Tumulak, nga Biyernes sa alas 5 sa hapon gihuman sa contractor ang pag-aspalto.
Dali nga napangitaan og sulosyon ang problema sa di patag nga bahin sa taytayan.
Samtang sa pagsusi sa taga Department of Public Works and Highways (DPWH), nakita nga pipila ka mga liki anaa lang sa ibabaw nga bahin ug dili kuyaw. Atol sa pagbukas, anaa sila Tumulak ug kadagkuan sa DPWH 7.
Matod ni Tumulak, gipaniguro ni DPWH 7 Regional Director Edgar Tabacon nga luwas agian ang taytayan sa tanang klase sa sakyanan.
Hinungdan nga nipahibawo na usab si Tumulak sa Cebu City Traffic Office nga mamahimo na nga makaagi ang mga bus sa taytayan sa Mananga.
Posible nga sulod ning semanaha magtagbo sila sa kadagkuan sa CCTO, CT-TODA, stakeholders ug mga operator sa mga bus.
PABALIKON O DI?
Kini alang na sa himuong panagsabot kon pabalikon ba sa pag-agi ang mga bus agi sa taytayan sa Mananga o padayon nalang sila nga diha sa South Coastal Road (SCR).
Giangkon hinuon ni Tumulak nga naobserbaran nila nga gikan sa Mananga bridge padung sa Tabunok flyover hapsay ang dagan sa trapiko.
Apan pag-abot sa may Bulacao area, ilabi na doul sa boundary sa Talisay City ug Cebu City, mosugod na sa paghuot ang trapiko. Kini karon ang usa sa gipangitaan sa CT-TODA og paagi nga maluagan ug ilakip sa ilang meeting uban sa taga CCTO aron mahisgutan.