MGA pinutos nga marijuana nasakmit gikan sa usa ka 18-anyos nga lalake atol sa buy-bust operation sa Drug Enforcement Unit sa San Nicolas Police Station sa Sabado sa kaadlawon, Septiyembre 14.
Ang buy-bust gihimo sa ubos sa flyover sa Barangay Bulacao, Siyudad sa Sugbo nga niresulta sa pagkasikop ni Riego Bert Michael Thommy Arago Fischer, 18, taga Sitio Laray, Barangay San Roque, Dakbayan sa Talisay.
Nasikop usab ang iyang kunsabo nga si John Dave Abapo, 23, taga sityo Kamanggahan, Barangay Labangon, Dakbayan sa Sugbo.
Si P/Major Kenneth Paul Albotra, hepe sa San Nicolas Police kinsa maoy nangu sa buy-bust, niingon nga si Fischer maoy ilang target.
Nasakmit gikan sa duha ang mga pinutos nga marijuana nga mobalor og P4,000 subay sa Dangerous Drugs Board (DDB) value.
Matod ni Albotra nga namugna ang ilang operation tungod sa pipila ka mga ginikanan nga nagpatabang sa usa sa iyang mga sakop.
Ang mga ginikanan nangreklamo nga nabalaka sila sa ilang anak nga nangapil sa pagbisyo og hithit sa marijuana.
Samtang si Fischer nidepensa nga dugay na nga napundo ang marijuana ug panagsa lang ang iyang paghatag sa mopalit, sagad mga kaila lang.
Ang duha mag atubang og kaso nga kalapasan sa Section 5 ug 11 sa Comprehensive Dangerous Drugs Act of 2002.
Sukad gihingusgan ang kampanya batok sa shabu sa pamunoan ni Presidente Rodrigo Duterte ug sa tinguha sa pipila ka sektor nga kini mahimong legal, mitumaw pagbalik ang mga mariuana plantation dinhi sa Cebu.
Ang labing uwahi nga naronda mao ang duha ka mga marijuana plantation sa duha ka mga bukirang barangay sa Dakbayan sa Danao sayo ning buwana.
Gibana-banang 10,000 ka mga punoan ang naibot.
Ang naibot sa kapulisan ug mga sundawo mobalor og P14 milyunes kapin base sa Dangerous Drugs Board (DDB) value. (BBT)