For sale: fake driver’s license sa internet

DRIVER'S license nga mamahimo rang makuha o ma-transact online?

Mao ni karon ang gitutokan sa Land Transportation Office (LTO) 7 human mismo ang regional director sa ahensiya nibutyag pinaagi sa iyang Facebook account sa mga tawo nga nagtanyag niini sa Marketplace sa Facebook o kining Facebook Group nga naninda sa social networking site.

Si LTO 7 Regional Director Victor Emmanuel Caindec nibutyag nga “fake” kining gitanyag nga mga driver’s license sa Facebook. “If wala ka niadto sa LTO to apply and passed the exam, sure na nga fake,” si Caindec nagkanayon.

Ang usa ka tawo mahatagan lang og driver’s license pinaagi sa pagtuman sa mga rekisito, sama sa medical exam ug drug test.

Human kini makuha, gikinahanglan nga moagi og written exam nga ipahigayon sa buhatan sa LTO.

Dugang ni Caindec nga ila na kining gitaho sa National Bureau of Investigation (NBI) aron maimbestigar.

“Constantly monitored na man na sila sa NBI. Hulat na lang ta madakpan,” bahad ni Caindec.

Sa Facebook post ni Caindec, giila niya ang mga naninda nga sila si Mae Cyrille Generalao, kinsa nagtanyag og lisensya sa Cebu Tindahan ug si Mike Laetner, kinsa nitanyag og lisensya sa Online sa Tindahan sa Mandaue.

“Unsa kaha maayo buhaton ani nila? Dili man gyud mo undang. Pwede ba kaha ni ipa “ads” na lang ni sila sa mainstream media? Kay madakpan mo bail ra man dayon. Cash pa. Business is booming ni sila,” sa Facebook post ni Caindec.

Pahibawo ni Caindec sa publiko nga nagtanyag sa maong mga card nga peke kini.

“Fake na nga cards. Ang tinuod nga license gi-upload na ang biometrics and facial capture data. Parehas ra na sa kwarta nga gi-print parehas nga printed pero naay fake,” pagpasabot ni Caindec.

Dili kini ang unang higayon nga aduna’y isyu sa driver’s license sa Sugbo, tungod kay niadtong Hulyo, unom ka mga kawani sa LTO Licensing sa SM Seaside ug laing duha ka fixers nadakpan sa NBI human nitanyag kini og fixing nga nagkantidad og P7,500.

Usa ning mga eksaminasyon sa pagkuha sa lisensya nga i-fixer sa kadaghanan tungod sa kalisod sa exam. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph