GIPABALIK sa African Swine Fever Task Force Cebu Province ang 150 ka mga buhing baboy nga nidunggo sa lungsod Dumanjug niadtong Biyernes, Septiyembre 13,2019 ngadto sa isla sa Negros.
Nidunggo ang barko nga nagkarga sa 150 ka mga baboy nga gikan pa sa La Libertad, Negros Oriental sa pantalan sa lungsod sa Dumanjug.
Tungod sa hugot nga seguridad nga gimando sa Executive Order 15 ni Cebu Governor Gwendolyn Garcia, ang Provincial Veterinary Office ug Philippine Coast Guard nga nag estasyon sa Tangil Wharf sa Dumanjug niinspeksyon sa barko aron masiguro nga ang mga baboy way African Swine Fever.
Sa dihang gipangayoan og mga requirements subay sa EO 15 ang barko, ang nagdala kuwang og live-stock handler’s permit, livestock and poultry transport/ carrier registration form ug disinfection clearance hinungdan nga wa tugoti nga makanaug ang mga baboy ug gipabalik kini pagdala sa Negros.
Wa gikompirma ni ASF Task Force Cebu Province Head Dr. Rose Vincoy kon ang mga baboy aduna bay African Swine Fever.
“Wala na nato tan-awa diha dapita (kon naa bay ASF). More on diha sa documentary requirements niya kay kon dili nimo ma-establish kon asa siya gikan nga farm, lisod man ang pag tracing ana,” pagpasabot ni Vincoy.
Mas gihatagan og dakong pagtagad sa pag-inspeksyon mao ang kompleto nga requirements nga tipik sa EO 15 aron masuta nila kon asa gikan ang mga baboy labi na nga sa ubang lugar sa nasud nakasulod na ang ASF.
“Kasagaran sa mga transit carrier kay makanaog naog man na sila, makakuha kuha og lain laing lugar. We don’t know kon gikan ba sila’g lain nga probinsya or didto ra ba dapita (Negros) mao nang importante ang disinfection clearance,” dugang ni Vincoy.
Nitabang sab ang Philippine National Police (PNP) ug Regional Veterinary Quarantine Offices sa pagpabalik sa barko sa Negros.
Sa pagkakaron, padayon gihapon sa pagbantay ang ASF task force Cebu Province sa mga pantalan aron pagsiguro nga di makasulod ang ASF sa Sugbo.
Human gikompirmar sa Department of Agriculture nga dunay mga baboy sa Bulacan ug Rizal nga nangamatay sa ASF, si Garcia nimando sa pag-ban sa mga baboy gikan sa Luzon.
Lakip sa ban ang mga produktong baboy sa Bulacan ug Rizal.
Tumong sa gobernador sa pagpatuman sa mando sud sa 100 ka adlaw mao ang pagseguro nga di makasulod ang ASF sa Sugbo.
Ang ASF di kuyaw sa tawo, apan grabe kini og epekto sa mga baboy, nga kasagaran sa natakdan nangamatay. /