PAMPANGA

Garcia: Ulaga ning Tetagan ning Diwa (The Value of Spiritual Resilience)

Kapisik

“Nwan ya ing ninumang magpakatatag lalam ning panyubuk uling,

nung atalakaran na na ing panyubuk, ing taung ita tanggapan ne ing putung ning bye a pengaku ning Ginu karing lulugud Kaya.”

Santyagu, Dangka 1: Sunis 12

(James 1:12)

“E kayu kakukulangan king kagagaran,

dapot pandatilan ing sigla ning diwa, susuyu king Ginu.

Tumula kayu king pagasa, mapanupaya king kapanamdaman,

manalig king pangadi.

~Rumanu, Dangka 12: Sunis 11-12

(Romans 12:11-12)

“E n aka sukat lumaban king labanang ini. Kunan yu na ing karinan yu;

Tikdo matatag at akit yu ing ipagkalub nang kalayan ning Ginu, Yuda at Yerusalem.

E kayu tatakut; e ko mimina lub. Lumwal kayu bang arapan la bukas,

At ing Ginu mantabe Ya kekayu.

~Kadwang Pamisalese, Dangka 20: Sunis 17

(2 Chronicles 20:17)

“Inya sa’t king kapakanan nang Kristu,

abuburi ku ing keynan, ing libak, ing kasakitan, ing pamamarusa, ing kasakitan.

Uling neng mayna ku, kanita ku masikan.”

~Kadwang Korintyanu, Dangka 12: Sunis 10

(2 Corinthians 12:10)

“Linaban ku king mayap a labanan, apupus ku ing siglulu,

apandatila ku ing kapanaligan.”

~ Kadwang Timoteu, Dangka 4: Sunis 7

(2 Timothy 4:7)

“Inya sa’t e kyu tatakut, uling abe yu ku, e kayu mangayna lub, uling aku ing Dyos yu.

Pasiknangan da ka’t sopan; itas da ka king matalaru kung wanang gamat.”

~Isayas, Dangka 41: Sunis 10

(Isaiah 41:10)

***

Anting kwayan a tutuki nu mu man ibaluktut, ipakli o batakan—ing diwa ning tau sukat ya namang matatag at apibayubayutuk king nu ya man miras makananu ya mang dumalan kaligaligan mengari king kwayan. Ding minunang sunis a misulat pane tetagan, sikanan at tepangan ing panaral da’t tuturu kekatamu. E mu sikan ning katawan at isip nung e tetagan at sikanan ning diwa.

Atin kekatamu ing magpakasikan la katawan. Mamulandit la aldo’ldo, mamwat lang mabayat, mag-batak lang katawan; ating mag-bisikletang malaut at ing kakanan da pane pampalusug katawan pati na isip. Mayap ita para king katawan at makakayap mu naman king isip. Dapot anggang nukarin na katamu asopan ning gawing antita? Sisikan la katawan, midarayu la king sakit at mikakatiwala king sarili dang sikanan pangkatawan.

Dakal a magaral bang mabyasa. Mamasa la namang miyayaliwang aklat. Maki-ugne la at makitaltalan la karing aliwang mangabyasa bang ding utak da mitayis lang anting pataram king batung mabye migagadgad. Mayap ita at makakayap king pamisip.

Tataram la panimanman at pamanaluse. Makapiyadya la karing dakal a kutang bang apakibatan dang saguli. Dapot anggang nukarin na katamu ayantabayanan ning sikanan ning pamikakatawan. Mekad uling masikan tamu—sisikan tamu naman lub nung balu tamung agyu tamu ing laban a singkasikan. Makasikan lub, makatapang at makaragdag kapanaligan king sariling katawan.

Makanyan man, agyang masikan ka katawan e pa mu rin makagyu nung e mu balung ipanglwalu ring aliwa at lalu na ing sarili mu nung ala kang balung panglaban karing masikampu.

Dapot agyang e ka masikan katawan at e ka naman masikan isip—o ala metung man kareta—nung atin na ka mang tetagan diwa, asaul mo reng antita king dakal a bage. Ngana pin ning diparan, “Ing kasalpantayanan malyari na lang ayalis deng bunduk.” Alang e na agyu ning masikan tetagan a diwa.

Inya pin sa’asaul neng David i Goliath agya man asne karagul i Goliath at asne kalati i David. Saltik mu asambut ne—oneng atin ya ping tetagan diwa inya antita. At ita ibat king kasalpantayanan na king Apung Ginu.

***

Dake Talabaldugan:

1.labóng/labúng – (palagyu) mura, anak o sagiwang kwayan, suli ning kwayan. English: edible young and tender bamboo shoot. Alimbawa king pamangamit: “Manyaman gugule ing labung lalu na nung samutanan mung saluyut at ditak a lara.”

2.labót/labút – (palagyu) dungus ding kaladwan o animal, libru-librwan. English: baw, belly of ruminant animals. Alimbawa king pamangamit: “Liklak ne labut ning bitin ing maragul a babi kaybat neng kelikatan.”

3.labsá – (panguri) bina lambut/malambut/ kulembut, lamyak/malamyak’ labno/malabno. English: hard to hold due to looseness. Alimbawa king pamangamit: “E ne mekapangan i Badung inyang ing inapag da kaya nasing bina labsa at inugse na namu neng e na buri tagana ita.”

4.labsák – (palagyu) laspag, linabis gamit o pangagamit. English: destruction by overuse or abuse. Alimbawa king pamangamit: “Bina ne labsak ing lamung seken da ri Taling at Kiku inya e la pa man misulung keng ligawan mitsab neng tambing.”

5.labúklabók/labúklabúk – (palagyu) danum ibat king dagat.

English: seawater taken from the sea. Alimbawa king pamangamit: “E ya malyaring lumwat bye ing ninuman nung labuk-labuk namu ing kayang inuman.”

***

Gawing mekalingwan karing Kapampangan!

Kanitang mengalabas a panaun, alus balang mula ding balang pibale-bale atin lang makatanam a kwayan at aliwa pang impun tanaman a makasaup karing makibale.

Deng kwayan pikukwanan lang wewe da bang gamitan king pamanulus, pamanalakad bale o miyayaliwang pamanluwagi, dapot metung pa ing labung. Kanita malyari kang manyad mu kaniti at makagyu na ing pasalamat o agyang timan mu king minye.

Ngeni, mal na naman ing labung uling pati keng supermarket da reng mall atin na mang mipipisali.

***

Pamipalino:

Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph