MIDEPENSA si basketball legend Kobe Bryant sa Team USA human sa dakong kapakyasan niini sa 2019 FIBA Basketball World Cup sa China.
“The days of the 1992 Barcelona ‘Dream Team’ are gone,” matod ni Bryant.
Ang kasamtangang Team USA pakyas pagdepensa sa ilang korona sa matag upat ka mga tuig nga kompetisyon ug ang nakapait pa, wala kini nakuha nga medalya.
Human nakatilaw og duha ka sunodsunod nga kapildihan nga nagsugod sa quarter-finals batok sa France, ang labing taas na lang nga maangkon sa Team USA ning tuiga mao ang ikapito nga luna.
Sa sunod nilang tahas, ang Team USA nakatilaw na sab og laing kapildihan batok sa Serbia.
Hinuon wala manuwa sa Team USA ning higayuna ang superstars sa National Basketball Association (NBA) sama nila ni LeBron James, James Harden, ug Stephen Curry.
Apan alang kang Bryant, bisan tapukon pa sa Team USA ang labing maayong mga magduduwa niini ning panahuna, dili na kini makadominar sa tibuok kalibutan dili sama sa Dream Team nga gipangulohan nila ni Michael Jordan, Larry Bird ug Magic Johnson.
“The best players that you think, which is going to make the best players that you can put on the floor, you are still going to have challengers,” matod ni Bryant. “It’s not going to be a cakewalk.”
Ang Dream Team ningharos pagdaog sa tanan nilang mga duwa diin pulos nalubong og taga liog ang tanan niining gikaatbang.
“The days of the 1992 Barcelona ‘Dream Team’ are gone so it’s going to be tough,” dugang ni Bryant, kinsa nakadaog og Olympic gold medal niadtong 2008 ug 2012.
Giingon nga ang Dream Team mao ang labing lig-ong puwersa nga naporma sa kasaysayan sa basketball sa kalibutan.
Ning tuiga, ang naglangkob sa Team USA pulos mga batan-on nga kinahanglan pang mahashasan og insakto hinungdan nga nagsalimoang kini.
Mao kini ang labing ngil-ad nga kampanya sa usa ka Team USA nga gilangkuban og mga magduduwa sa NBA.
“It’s not a matter of the rest of the world catching up to the US,” pasabot ni Bryant.
“It’s that the rest of the world has caught up for quite some time, to a point now where . . . we are just going to win some and lose some.”
Nidugang si Bryant nga dili ikasurpresa ang nahitabo sa Team USA gumikan kay ninglambo na sab gyud ang kapabilidad sa ubang mga nasod sa natad sa basketball.
Gibalik lantaw ni Bryant ang iyang pagduwa sa Redeem Team nga maoy tawag sa Team USA sa kampanya niini sa 2008 Olympics diin ning-agi sila og grabeng pagpanghudlat una nila nabuntog ang Spain sa finals.
Niadtong panahuna, nabatyagan na nga ningsaka na ang kalidad sa basketball teams sa ubang mga nasod. (AP, ESL)