Mga duwa karon
12:30 pm- USJ-R batok USPF (High School)
2:00 pm- USC batok UC (High School)
3:30 pm- CITU batok SWU (High School)
5:00 pm- UV batok UC (College)
Langkaton og suway sa defending champion University of the Visayas (UV) Green Lancers ang ilang ikaduhang sunodsunod nga kadaugan sa samang gidaghanon nga mga duwa sa ilang pagpakigbatok sa University of Cebu (UC) Webmasters sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Green Lancers, nga gitangtangan og korona sa Southwestern University (SWU) - Phinma Cobras sa miaging Partner’s Cup, nagbangis sa premiro nilang tahas ug gipahimungtan niini ang University of San Carlos (USC) Warriors, 74-53.
Sa ulahing interbyu sa Sun.Star Cebu, nagkanayon si Green Lancers coach Gary Cortes nga nangandam sila og insakto ning higayuna gumikan kay determinado silang langkaton ang ikaupat nilang sunodsunod nga titulo.
Usa kini ka pamahayag nga nagsilbeng pahimangno sa Webmasters.
Ang Webmasters usa sa mga gikonsiderar nga makahudlat sa tinguha sa Green Lancers apan wala kini nakitaan og maayong senyales sa nag-una nilang duha ka mga duwa.
Ang Webmasters nabunyagan og kapildihan batok sa Cobras, 65-58, niadtong Septiyembre 1 ug nasundan kini’g overtime nga kapildihan batok sa University of Souther Philippines Foundation (USPF) Panthers, 78-72, niadtong Septiyembre 10.
Hinuon ubos sa paggiya ni multi-titled coach Raul “Yayoy” Alcoseba, ang Webmasters gilaumang makahimo og adjustment aron makabangon gikan sa kasamtangan nilang sitwasyon.
Sa high school division, magsangka sa premirong duwa ang usa sa labing gikahadlukan nga mao ang University of San Jose Recoletos (USJ-R) Baby Jaguars ug USPF Baby Panthers.
Mosunod niini ang engkuwentro sa UC Baby Webmasters batok USC Baby Warriors dayon ang panagsangka sa SWU Baby Cobras batok Cebu Institute of Technology University (CITU) Wildkittens.(ESL)