Sa matag tan-aw ni Ponciano Baritos sa iyang kamanghuran nga anak nga si Chann Gasper, mahinumduman niya ang iyang asawa nga si Charito.
Si Chann ang susama og panagway sa iyang inahan, sumala sa 46 anyos nga amahan, drayber og KMK bus.
Buhong unta sa pagmahal ni Charito ang kamanghuran nga anak.
Apan, naputol kini dihang ang 40 anyos nga inahan namatay niadtong Marso 24, 2019.
Sigon ni Ponciano gi-high blood ang iyang asawa ug ni-complicate kini sa iyang kasingkasing.
Dili man makatagamtam og pag-amuma ug pagmahal si Chann gikan sa iyang inahan, apan mabulahan usab kini sa pagpangga ug pagmahal gikan sa iyang upat ka mga maguwang.
Niadtong Septiyembre 5, 2019, gisaulog ni Chann ang labing unang kasumaran sa iyang adlaw nga natawhan.
Ang birthday party gihimo sa panimalay sa mga Baritos sa Barangay Tabionan, lungsod sa San Fernando, habagatang Sugbo.
Ang party may tema nga baby shark diin nalingaw ang mga bata nga mga bisita sa games nga giandam.
Nabusog usab ang mga bisita sa giandam nga mga pagkaon sama sa humba, spaghetti, bam-i, inasal nga baboy, lumpia ug may ice cream.
Si Ponciano nanghinaot nga mapadako ang lima ka mga anak nga mga buotan ug may respeto ug pagmahal ngadto niya, subay sa kabubut-on sa Ginuo.
Ang laing upat niya ka mga anak mao sila si Fritzie May, 24; Evan Rey, 23; Clemenze Lory, 22; ug Charles Ian, 11. (SCG)