KAGAHAPON, 10th death anniversary sa akong anak nga si Mary Heart. Ang iyang kamatayon maoy nidala nako sa mountain biking as a way of coping. Ang akong first mountain bike napalit nako sa December 2009. Ang among first bike mao ang iyang kiddie bike nga na-enjoy niya og maayo.
Naghisgot ko ini kay ang mamatyan ka og minahal sa kinabuhi lisod baya kaayo. Di lalim. Maora kag mawad-an sa paglaum sa pagpakabuhi. Dako kaayo og natabang nako ug sa akong asawa ang biking sa among pag-cope sa kamatayon sa among anak. Mao kadto ang labing pait nga kasinatian namo isip magtiayon. Mao usab kadto ang labing pait sa tanang kasakit sukad ko nahimugso ning kalibutana.
Kaingon nako ang labing sakit mao ang mabuwagan ka og uyab o kanang kasab-an ka pirme sa imong parents. Layo ra diay kaayo ang kasakit nga imong bation kon ang mawala nimo ang imong minahal nga imo na lang makita pinaagi sa paghandom diha sa imong alimpatakan.
Di ma-describe ang ka sakit nga bation. Mao na ang uban makasinati og depression nga kon mapasagdan, kuyaw mosangko sa suicide o kaha pagkabuang.
BIKING
Ang akong asawa kanunay nakong dad-on sa emergency room sa North General Hospital kay maglisod na siya og ginhawa. But kon mapakalma na siya sud sa emergency room, okay na ang iyang blood pressure ug uban pang lab test results.
Ang diagnosis sa doktor mao ang stress nga nag-anam na og padung sa depression. Ang tambag sa iyaha sa doktor mao ang pag-exercise ug paglingawlingaw. Mao nga ako na siyang naagni nga mokuyog sa among mga Friday night ride. Sukad siya nagsige og apil sa among mga sikad, later on sa akong mga tindak sa karsada nga kami rang duha, wa na siya madala pa og emergency room. Sakto ang diagnosis sa doktor niya. Kuyaw diay ni ang stress kon mapasagdan. Busa kon naa kay mga timailhan sa stress, mas maayong imo ning kombatihon samtang sayo pa. Usa sa labing maayo nga pagkombate ani mao ang pagpasingot. And ang labing maayong paagi mao ang biking.
NAGUOL
Na-shock ug naguol ko dihang Mactan-Cebu Bridge Management Board niduso sa pag-ban sa mga biseklita sa duha ka bridges kay nakahibawo ko sa di maayong epekto niini sa biking community, diin dunay pudyot sa mga miyembro nga naggamit sa cycling isip paagi sa pag-cope sa stress karong panahuna.
Kini ra bang duha ka bridges maanindot kaayong tindakan. Maanindot usab ni nga rota niadtong seafood lovers kay naa sa Cordova ang lamian nga bakasi.
Nalipay ko nga instead i-ban, paagion ang mga siklista nga magduot sa bikes subay sa pedestrian lanes. Alang nako okay ra ni kay kuyaw na baya karon ang kahimtang sa trapiko, labina sa pagdaghan sa mga nagmotorsiklo, ang uban gago magmaneho.