ESTRIKTO nga numero uno si Mr. Wakam Lee Pung sa iyang mga empleyado. Ilabi na sa mga guwardiya sa ‘mala-palasyo’ niyang pinuy-anan. Adunahan siyang Insek nga magpapatigayon, kinsa may mga negusyo nga nagdagan sud ug gawas sa dakbayan sa Sugbo. Ang nakaayo kay maayo siyang mosuweldo niadtong magtinarong sa trabaho. Sila dali ra niyang usbawan sa suholan. Pero sa mga tapulan ug buluyagon, tulin pa sa alas kuwatro nga iyang putbulon. Lagi, labi na sa mga guwardiya sa iyang mansiyon. Kontra kaayo sa iyang buot nga may makita nga magduka-duka sa puwesto. Samot nag may hisakpan nga makatug nga nag-dyuti sa gabii. Way daghang seremonyas nga mangasaba: “Hala, ikaw kana layas! Kalon dayon! Ngano ikaw tulok-tulok imo talmaho? Ikaw kana putmol na! Kalaho ka!” Magkayuring si Mr. Wakam Lee Pung pagpangasaba nga Binisaya.
Pero karong bag-o morag nakauyon si Mr. Wakam Lee Pung ining bag-ong security guard sa iyang mansiyon, si Burokito. Matinud-anon kini sa trabaho. Buotan ug kasaligan kining hamtong na nga ulitawo nga taga probinsiya. Mao nga pipila pa lamang ka bulan sa iyang serbisyo giumentohan ni Mr. Wakam Lee Pung ang iyang suweldo.
“Daghan kaayon salamat kanimo, Sir!” ni Burokito nga malipayon.
“Wa sapayan. Masta ikaw maayo talmaho, ako kana malos pod maayo nimo.” Ug gipikpik sa Insek ang abaga ni Burokito.
NANGLABAY ang mga adlaw. Nagdugang ang maayong pangalagad ni Burokito. Nagdugang usab ang pagsalig sa iyang agalon ngadto kaniya. Gani, giisip ni, Mr. Wakam Lee Pung nga dili lang kay usa ka tapat nga empleyado si Burokito, kundili usa ka maayong higala.
Usa ka adlaw, eskidyul ni Mr. Wakam Lee Pung nga moadto sa Hongkong kalabot sa patigayon. Apan gitambagan siya ni Burokito nga iuswag ang biyahe sa sunod higayon. Malagmit kuno nga madisgrasya ang ayroplano nga iyang sakyan nianang adlawa. Sanglit Insek nga matuo-tuohon sa mga ‘regla’ sa panahon, wa mahinayon si Mr. Wakam Lee Pung sa iyang tuyo ngadto sa Hongkong. Nanagana siya, kay tuod kon may disgrasya.
Tuod man, nianang pagka hapon misibaw sa mga sibyaanan sa kahanginan ang balita nga may ayroplano nga nahagsa sa dagat. Way usa sa mga pasahero ug mga ‘flight crew’ ang naluwas. Ang maong abyon mao unta ang sakyan ni Mr. Wakam Lee Pung paingon sa Hongkong. Nakapang-Hesus siya og di oras sa pasalamat, labi na ngadto kang Burokito.
“Laghan jud salamat sa imo, Bulokito! Kon wala pa kana ikaw pugong ako lakaw, ako kana paktay na kalon!” ni Mr. Wakam Lee Pung. Mipahiyom lang si Burokito.
“A, kining, Bulokito, ngano diay ikaw tag-an man lisglasya ayroplano ako unta kana sakyan?” sukna ni Mr. Wakam Lee Pung.
“Nagdamgo man god ko, Sir. Mora gyug tinuod nga nakita tika nga usa sa mga biktima sa maong disgrasya!” tug-an ni Burokito.
“Ikaw, damgo? Nus-a kana ikaw damgo?”
“Gabii, Sir!”
Kalit milurat sa kapungot ang pikot nga mga mata ni Mr. Wakam Lee Pung. “Aha! Ikaw kana tulok diay imo dyuti gabii! Talantado ka! Hala, layas kalon dayon, Bulokito! Ikaw putmol na imo talmaho!”
Wala katingog si Burokito nga nahibulong. Apan miduko na lamang siya ug mitalikod kang Mr. Wakam Lee Pung. (KATAPUSAN)