SA mga fans ni Sarah Geronimo maghudyaka na sab mo kay hapit na nato makita ang bag-ong pelikula sa pop star. Karon pa lang daghan na ang naghinam-hinam niini.
Katapusan nato siyang nakita sa pelikulang “Miss Granny” nila ni James Reid.
Sa bag-o niyang pelikulang “Unforgettable” sa Viva films ug Idea First, usa ka iro ang makauban ni Sarah dinhi nga si “Happy”.
Tungod sa maong iro nga nahimong close na kang Sarah daghang dog tricks ang iyang nakamaohan.
Importante ang papel sa maong iro, mao nga hapit sa tanang eksena ni Sarah kauban kini ug siguradong mapamahal sa atong bida si “Happy”.
Sa laktud nga pagkasulti daw kini ang kalabtim karon ni Sarah G. Apan gawas sa iro may daghan pang kauban dinhi ang dalaga, una niini si Regine Velasquez Alcasid.
May mga guest stars usab dinhi sama nilang Cherrie Gil, Tirso Cruz III ug Anne Curtis. Lakip sa cast silang Ara Mina, Meg Imperial, Kim Molina ug Gina Pareño.
Ang “Unforgettable” sa direksyon ni Jun Lana nga coming soon sa mga sinehan, ay’g saba!
Nakita nako ang unang episode sa Kapamilya drama- fantaseryeng “Parasite island” nga sugilanon sa usa ka pamilya ug mga anak nga nag-ilogay sa kabilin.
Aduna say mahitabo nga kalamidad ug krisis nga ilang atubangon. Mga bida dinhi silang Liza Lorena, Michael Flores, Bernard Palanca, Rafael Rosell, Bianca Manalo, Ria Atayde ug Desiree del Valle.
Naa sad si Kaori Oinuma, usa sa mga housemate winner sa Pinoy Big Brother. Atong manuntan ang ilang sugilanon matag Dominggo sa gabii sa oras niadto sa “Wansapanatym”, ay’g saba!