HUMAN sa daghang mga pagsaway ug pagsupak sa publiko, bisan kadtong di miyembro sa biking community, ang Mactan-Cebu Bridge Management Board ubos sa pagpangulo ni Gobernador Gwendolyn Garcia nihukom nga di na i-ban ang biseklita sa duha ka bridges.
Matod ni Garcia nga kinahanglan nga mokanaug ang siklista, moguroy sa iyang biseklita samtang magsubay sa pedestrian lane sa duha ka mga taytayan.
Tinuod, gidili sa balaud ang paglabang sa mga siklista sa mga taytayan ug flyover kay alang ra kini sa motorized vehicles. Alang usab kini sa kaluwasan sa mga siklista taliwa sa nagkagrabeng kahimtang sa trapiko karon.
Sakto ang lakang nila ni Garcia ug sa board nga naghuna-huna sa kaluwasan sa mga siklista. Karon ra ba, ang hari sa filtering di na ang mga siklista, kon di ang mga tigmotorsiklo, ang uban magpataka lang sa pagmaneho.
Maayo na lang sab ni kay sa total ban ang ipatuman. Mag-unsa na lang ang mga trabahanteng yano nga nagsalig sa biseklita aron makadaginot sa pletihan kada adlaw. Daku na kaayo kini nga saving o matigom labina kon kaduha o katulo mosakay ang usa ka tawo. Sa yano nga trabahante nga kada adlaw nagsakay og ingon niana ka daghan, tabang kaayo ang biseklita.
Maora na sab og mga piniriso sa ilang isla ang mga siklista sa Dakbayan sa Lapu-Lapu ug Cordova nga di na makalabang sa mainland. Gikinahanglan nila ang laing sakyanan nga kargahan aron sila makatabok.
Unfair usab nga ang pag-ban sa biseklita tungod sa rason nga mao ang pagpugong sa mga suicide sa duha ka bridges. Duna bay naghikog nga nagbiseklita o kon duna man, pila ka buok? Kon nag-taxi ang naghikog, di na sab paagion ang nagtaxi?
Bitaw, ang hukom nila ni Garcia ug kaubanan sa board angay nga hangpon sa biking community kay wa gihingpit ang pag-ban, nga duna ra ba gyud untay legal nga pasikaranan.