SUPERBALITA CEBU

Diola: Bili

Mao Diay

TILAWI unya kini. Mahal baya ni. Lami ni,” moingon ang usa nga edad-edaran nga lalaki sa iyang bisita kon maghikay siya. Presyo ang gibasihan niya sa bili sa mga butang. Natural kini sa atong kalibotan diin kuwarta maoy nagpatuyok niini. Kon mas mahal gani mas bililhon. Kon mas taas og suweldo mas bililhon nga empleyado. Kon mas dako ug luho nga panimalay, mas taas og posisyon sa katilingban.

Lainlain tag basehanan sa bili sa atong mga binuhat. Dili lamang presyo. Usahay may gitawag nga “sentimental value” sama sa karaan nga retrato. O gubaon nga CD, DVD, plaka, ug cassette tape. Sa mata sa kalibotan wa na kiniy bili apan bililhon lang gihapon sa nakapanag-iya niini.

Gihisgotan sa ebanghelyo ni Lucas ang tulo ka butang nga dili mapulihan kay bililhon sa paaging dimatigkad: ang nawala nga karnero, ang nawala nga sensilyo, ug ang nawala nga anak nga lalaki. Sa kalibutanong perspektibo, kining tulo wala nay kapuslanan. Nganong biyaan man sa magbalantay ang kasiyamag-siyam nga karnero aron pangitaon ang nawala? Nganong halungkaton man ang tibuok balay aron makaplagan ang usa ka sensilyo? Nganong gidawat man sa amahan ang iyang waykapuslanan nga anak?

Ang bili sa tawo, kay ang karnero ug usa ka dako misimbolo sa tawo, dili matugkad sa tawhanong panglantaw lamang. Bililhon kini ug ang way kapuslanang anak tungod kay minugna sila sa Dios ug ang gugma ug kaluoy sa Dios maoy mipahiuli sa bili.

Mas dali pang pugngan sa Dios ang iyang kalagot ka sa iyang kaluoy. Dili Siya putong. Mahangyo Siya. Mao kini mensahe sa libro sa Exodo. Hapit nang mobuto ang kalagot sa Dios sa mga Israelita nga gahi kaayog ulo apan napugngan kini sa dihang gipahinumdoman Siya ni Moises sa kasabotan nga gihimo Niya tali kang Abraham, Isaac, ug Israel nga ipakuyanap Niya ilang kaliwatan.

Personal nga perspektibo ni San Pablo sa sulat ngadto kang Timoteo. Giila ni Pablo nga ang Ginoo nagmaluluy-on kaniya tungod kay sa iyang binuhatan kaniadto tinukmod kini sa iyang pagkaignorante. Ug pinaagi sa maong kaluoy nahimong panig-ingnan si Pablo sa pailob ni Jesucristo.

Kining mga puntoha mahitungod sa atong pagkabiliohon sa mga mata sa Dios kinahanglan hinumdoman nato ilabina sa mga panahon nga layo kita sa Dios tungod sa sala. Bililhon gihapon kita bisan pag nalayo kita tungod sa atong binuhatan. Maghinulsol lamang kita ug mosalig nga wala pa kita mobalik sa Dios gipangita na kita Niya. Walay nibalik sa Dios nga napakyas.

Mituo ba kita nga kitang bililhon sa mata sa Dios?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph