COTABATO-native fighter Romero “Ruthless/Mangtas” Duno pabiling World Boxing Organization (WBO) North American Boxing Organization (NABO) Lightweight champion human sa 7 rounds knockout nga kadaugan batok “American “Striker” Ivan Delgado sa Dignity Health Sports Park sa Carson California, USA Sabado, Septiyembre 15, 2019.
Si former world boxing champion Rodel Mayol, chief trainer ni Duno, nibutyag sa Superbalita Cebu nga game plan nila nga dili sila magdali sanglit mas bug-at sa timbang ang kontra busa expected nga weak kini kon magkadugay ang away.
“Akong masulti nga lig-on gyud si Romero (Duno), although naa pa siyay kulang pero every fight naa kini makat-onan. Happy ko sa iyang performance pero dili ko kontento daghan pa kuwang like combinations sa mga sumbag nya pag kuha ug distance,” matod ni Mayol.
Ang garbo sa 2nd class Municipality of Tulunan, Cotabato province nga si Duno gumikan sa kadaugan misaka ang baraha sa (21-1, 16KO) samtang ang kaparotan ni Delgado nahugno ang rekord sa (13-3-2, 6KO).
"Nindot ang duwa ganina Duno vs Delgado kay sumbagay sakto, ang kusog ni Duno gikaon ni Delgado tungod sa iyang gidak-on. Para nako, yes ready na si Romero kang Ryan “The Flash” Garcia (18-0, 15KO),” butyagni ex-WBO Bantamweight King Marlon “Nightmare” Tapales.
Ang Duno-Delgado undercard sa main event nila ni Mexican Jaime Munguia vs Ghana, African Patrick Allotey nga gidalit sa Golden Boy Promotions.
Elorde Pildi
Sa pikas bahin sa MGM Grand Garden Arena sa Las Vegas, Nevada ang apo ni Pinoy boxing legend former world champion the late “Flash” Gabriel Elorde napildi.
Si world title challenger Juan Miguel “The Boss” Elorde, anak ni Promoter Johnny Elorde (28-2, 15KO), nasunggo sa ikatulo nga hugna busa na knockdown apan sa 4th round TKO ang resulta human gihunong ni referee Russell Mora dihang walay undang nga gikulata si Elorde ni Mexican WBO 122-lb King Emanuel “Vaquero” Navarrete. (Daniel Quindao Guden, US Correspondent)