ANG kanhi pambato sa Davao City nga manlalangoy ug triathlete nga si Mary Pauline Fornea mobandera ug mopakita og aksiyon sa unang higayon sa 30th Southeast Asian (SEA) Games diin ang Pilipinas maoy host karon nga tuig.
Ang 25-anyos nga kasamtangang nakabase sa U.S.A. isip foreign schooling cadet sa Philippine Military Academy to the United States Naval Academy nagkuha og double engineering majors, nagkanayon.
"Opo, first time ko po Ma'am. Ultimate childhood dream ko po (na sumali sa SEA Games),” matud ni Fornea
Aron makahunat sa preparasyon nag-leave siya sa iyang military duties ug pagtuon aron makasalmot sa SEA Games qualifying, diin ikatulo siya sa women’s elite event sa Pilipinas Duathlon Final Leg niadtong Hulyo 21 sa nasud.
Nakakuha sab siya og slot sa national team tungod sa impresibo niyang duathlon record sa States.
Dayon nagbansay siya sa Standard Insurance Duathlon team apan mibalik sa Annapolis, Maryland niadtong Agosto 13.
“I will be training on my own with the guidance from the national team po,” suma sa University of the Philippines (UP) Mindanao alumnus.
Alang niya, di sayon ang pagbalanse sa oras sa iyang military ug school duties lakip na pagbansay sa SEA Games.
“I expect to maintain my academic grades and military duties while preparing for SEA Games po.”
Ang Duathlon nga giapil sa 30th SEA Games ilawom sa category 2, himuon sa Subic Bay Boardwalk, Bldg. 229 Area uban ang triathlon ug open water swimming.
Si Fornea kanhi midomina sa city, regional ug national age-group ug college swimming ug triathlon race samtang ania pa siya sa Davao City kaniadto.
Nahimugso siya sa Makati City apan nakumpleto ang iyang elementary education sa Kapitan Tomas Monteverde Sr. Elementary School niadtong 2005 ug ang iyang secondary education sa Davao City National High School niadtong 2009.
Usa siya ka iskolar sa Department of Science and Technology dihang siya nagtungha sa UP Mindanao.