SUPERBALITA DAVAO

Genoguin: Duterte, popular pa ba?

Kontra balanse



TULO nalang ka tuig ang tungasunon sa kabug-at sa problema nga giatubang karon sa atong Presidente Rodrigo Duterte; problema nga dili dali nga sulbaron ubos sa katarungan nga nagkabahin-bahin kitang mga katawhang Pilipino.

Tulo ka dagkong suliran ang giatubang karon sa atong nasud, kansa naglabad ang ulo sa atong presidente kung unsaon sa pagsulbad niini.

Ang una, mga kawani sa mga pribadong buhatan nga kanunay nangayo og usbaw sa ilang adlaw adlaw nga suholan tungod sa kamahal sa atong mga nag-unang palaliton.

Ikaduha mga mag-uuma nga apektado sa biktima sa mga importer nga bugas nga gipuhalan ang ilang presyo ug wala na’y insaktong kita nga halos dili na mabuhi ang ilang pamilya.

Ang ikatulo mao ang mga "oligarch" mga negusyante nga halos miyembro sa gabinite, nga ang tumong ang pagpalambo sa ilang mga negusyo nga minahan, ug uban pa nga gipahimuslan ang ilang posisyon samtang nakadikit pa sila sa atong presidente.

Daghang problema nga gisulbad ang atong presidente, kon inyong namatikdan kasagaran mga mag-uuma nga gipanghatagan og mga yuta nga gusto nilang ugmaron, dili hinuon tanan, kay kadtong mga tawo nga gigamhan sa idolohiyang komunista dili nato nimo madala kay dulot na sa ilang bukog ang hiwi nga pagtulon-an nga gitisok sa ilang alimpatakan sa mga tawo nga gigamit ra usab sila.

Kung atong tan-awon si presidente Duterte sa giatubang nga problema sa atong nasud, kon mahimo palang nga tapuson na ang iyang termino, himuon na niya kay halos dili na niya kaya ang pagsulbad sa mga mabug-at nga problema sa atong nasud.

Ang pinakadagkong problema nga iyang gipas-an karon dili basta basta, ang droga nga iyang gipanumpaan nga mawala sulod sa unom ka bulan sa iyang pagpangatungdanan, labaw sa tanan kurapsiyon, pero karon, grabi ang kurapsyon sa mga nag-unang ahensiya sa atong gobyerno.

Sa pangutana, popular pa ba si presidente Rodrigo Duterte? Ang tubag, 'oo sa mga lower ug middle class tungod kay hinay hinay gihatagan niya sila og tubag sa ilang nag-unang mga problema.

Kung dili siya popular, naturalmente sa iyang mga kaaway sa politika lamang, pero normal na, kay duna may halo nga pamolitika, kon inyong hinumdoman, labing una sa kasaysayan sa mga eleksyon nga milabay, karon lang nga wala gyo'y midaug nga kandidato sa oposisyon.

Buot ipasabot gihugopan pa sa nga kabus ang sistema sa iyang administrasyon, pero hangtud kanus-a?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph