KIDAPAWAN CITY -- Hugtanong nagbantay ang namugnang Task Force (TF) Bantay Karne sa Rehiyon 12 batok sa African Swine Fever Disease (ASFD).
Matag lungsod dunay nagbantay nga mga miyembro sa TF Bantay Karne gikan sa National Meat Inspection Service (NMIS) 12.
Gitutokan sab pag-ayo sa NMIS ang ilang pagpaniid sa mga gipamaligya nga karne sa baboy sa Soccksargen.
Gipamahayag ni NMIS 12 director, Myrna Habacon, nga kung mopalit og karne sa merkado publiko seguruhon nga dunay meat inspection certificate ang mga namaligya niini.
Tumong niini nga malikayan ang pagkatag sa ASFD ug maseguro ang kaluwasan sa publiko human nga nagpositibo ang maong sakit sa baboy sa Luzon.
Hinuon, gipaklaro ni Habacon nga walay dapat ikabalaka bahin sa potensyal nga pagkaylap sa ASFD sa Rehiyon 12.
Gipatin-aw ni Habacon nga tungod sa igo nga suplay, walay usa nga nag-import sa baboy sa rehiyon. (Edgar Fuerzas)