NORTH COTABATO -- Mitaas pa ang ihap sa dengue cases sa siyudad sa Kidapawan sugod bulan sa Enero hangtud sa Septyembre 7.
Miabot na og 764 ang dengue cases sa dakbayan nga mas taas og 521 porsiyento kung itandi sa susama nga panahon niadtong tuig 2018.
Kini subay sa pinaka-ulahi nga talaan nga gipagawas sa City Epidemiology Surveillance Unit (CESU) sa Kidapawan City Health Office nga anaa na karon sa above epidemic threshold.
Una nga nagdeklara og State of Calamity ang Kidapawan City gumikan sa dengue apil sab ang tibuok probinsiya sa Cotabato niadtong miaging bulan.
Plano sab sa City government nga mopasa og Anti-Dengue Ordinance karong tuiga nga maoy nakita nilang pamaagi nga makunhuran ang ihap sa mga nagkasakit og dengue.
Naghangyo sab ang City Health Office sa katawhan sa siyudad nga manghinlo sa ilang palibot og gamiton ang 4 o'clock habit aron mapatay ang mga lamok nga nagdala og dengue.
Gitutukan sab ni Mayor Joseph Evangelista ang mga nagkasakit og dengue sa siyudad ilabina ang paggahin og pondo nga ikatabang sa ilaha ilabina kadtong mga pobre kaayo nga pamilya sa siyudad. (Edgar Fuerzas)