PANABO CITY -- Nakugang ang mga residente dihang napalgan ang patay nga lawas sa lalaki nga nagbuy-od likod sa balay sa pamilyang Polinar sa Purok 11, Tony Boy District, Barangay A. O Floriendo, Panabo City alas 4:00 sa kaadlawon, Sabado, Septiyembre 14.
Ang biktima giila sa mga molupyo nga si alias "Mardy", anaa sa pangedaron nga 40 ngadto sa 45-anyos.
Gikataho nga ang biktima walay pernamenteng adres ug wa usab paryente sa maong dapit sanglit nagsuroy-suroy lang kini sa sulod ug palibot sa maong dapit sukad pa niadtong tuig 2010 ug nagapangayo lang og pagkaon sa mga tawo nga maoy iyang panginabuhian.
Ang maong biktima giingong adunay sakit sa pangisip ug nabantayan nga nag-atos sa gahi nga ubo sulod sa hataas nga panahon.
Gidala ang patay nga lawas sa biktima sa Carmen District Hospital ug nasuta nga ang gikamatyan niini mao ang Respiratory Failure.
Walay nakit-ang foul play ang kapulisan sa kamatayon sa biktima nga gipahiluna sa Rivera Funeral Parlor sa National Highway, Barangay Sto. Nino, lungsod sa Carmen. (Dexter T. Visitacion)