TAGUM CITY -- Samdan ang usa ka lalaki nga gisugat og bala human misanong sa pagdapit kaniya nga muadto sa bunkhouse sa kanhi kauban sa trabaho nga nahimutang sa Kilometro 48, Bingcungan alas 2:20 sa kaadlawon Sabado, Septiyembre 14.
Ang biktima giila nga si Melchimar Bodiongan, 26-anyos, pump boy/crew sa Apokon Petron Gas Station, molupyo sa Purok Budiongan, Barangay Visayan Village.
Sa report nga nakuha gikan sa Davao del Norte Police Provincial Office, nasayran nga usa ka taho ang nakaabot sa Tagum City Police Station gikan sa Davao Regional Medical Center pinaagi sa tawag sa telepono nga nagbutyag sa usa ka pasyente nga adunay samad pinusilan nga gidala sa maong ospital.
Gilayong miresponde ang mga pulis aron sa pag-imbestiga ug nasayran nga alas 12:30 sa tungang gabii sa samang adlaw ang biktima giimbitahan pinaagi sa Facebook Messenger sa iyang higala nga si alyas "Ma'am Ivy", kanhi kauban sa trabaho sa Shell Gas Station nga paadtuon sa bunkhouse niini.
Apan, pag-abot sa dapit usa ka wala mailhing lalaki ang nakigtagbo sa biktima ug sa wa masayring rason, gipusil ang biktimang si Bodiongan sa makaduhang higayon gamit ang .38 revolver.
Naigo ang biktima sa walang bahin sa bukton, apan swerte nga nakadagan ug miadto sa balay sa iyang mga paryente ug nagpatabang nga madala sa ospital aron matambalan.
Sa pagsusi sa kapulisan sa crime scene, ilang narekober ang motor nga iya sa biktima nga gi-parking sa dalan.
Dugang pagpanubay ang gilusad sa Tagum CPS sa tinguha nga masuta ang motibo sa nagpaluyo sa maong krimen.