KANHI sakop sa University of San Carlos (USC) Warriors Nico Magat mipakita sa iyang kalantip sa dihang gipatilaw sa 2008 Flyboys ang 2015 Samurai sa ilang unang kapildihan, 67-64, sa nagpadayon nga USC-North Alumni Basketball Club Cebu City Mayor’s Cup niadtong Sabado, Septiyembre 15 sa USC North Campus Gym, General Maxilum Avenue, dakbayan sa Sugbo.
Si Magat mipakatap og 18 puntos nga may siyam ka rebounds, tulo ka assists ug duha ka steals alang sa ilang ikaduhang daog sulod sa tulo ka duwa nga susama ra usab Samurai.
Samtang sa Senior’s division, nakalabnot na gyud ang 1982 Golden Warriors og daog sulod sa tulo ka duwa human nila malit-ag ang 1991 Tigers, 69-65.
Si Jonathan Diaz maoy nahimong mahait nga hinagiban alang sa Warriors human kini mipakatap og 22 puntos, unom ka rebounds, upat ka assists ug upat ka steals. Kadto maoy ikaduhang sunodsunod nga pagkapukan sa 1991.
Sa Division 1, nagpabilin nga wala pay mansa ang 1997 Ronins pinaagi sa pagkulit og 92-77 nga kadaugan batok sa 1992 Little Rascals. Kadto maoy ikaupat nga daog sa team.
Si Al Bughao nangulo sa Batch 1997 nga may 28 puntos ug pito ka rebounds.
Nagmadaugon usab ang 2001 Shipmen batok sa 2001 Millennium Bugs, 68-65. Si Condrad Plando mipahagsa og 21 puntos alang sa Shipmen kinsa susama usab sa Bugs mirehistro og 2-1 nga baraha. (JBM, JNP)