PAKYAS ang apo ni Pinoy boxing legend ug kanhi world champion “Flash” Gabriel Elorde nga si Juan Miguel “The Boss” Elorde sa paglangkat og world title human kini ma-knockout sa ikaupat ka round ni Mexican WBO super bantamweight champion Emmanuel Navarrete sa ilang away kagahaon didto sa T-Mobile Arena sa Las Vegas.
Agresibo untang nakasugod si Elorde sa first round diin permi niyang maigo sa iyang wala nga overhand si Navarrete kinsa daw og sa naniid lang sa iyang lihok niadtong higayona.
Apan sa second round, nausab ang timplada sa away sa dihang mipahagsa si Navarrete og usa ka solidong wala ngadto sa lawas ni Elorde nga gisundan og laing tuo nga uppercut ngadto sa apapangig nga nakapawingig sa Filipino challenger.
Sa third round, hingpit nga nausab ang dagan sa away, ug ning higayona, si Navarrete na usab ang mipauwan sa og mga kumo nga moigo sa lawas ug ulo ni Elorde kinsa natumba apan tukma sa pagkapupos sa oras.
Gipaaway pa man tuod si Elorde sa iyang mga coaches sa fourth round, apan ang duha ka sunodsunod nga solidong kumo ni Navarrete nga mitugpa sa ulo ni Elorde maoy nakapaaghat ni referee Russell Mora sa pagundang sa away. Ang oras, 26 segundos ang nahabilin sa fourth round.
Sa kadaugan, ang 24 anyos nga Navarrete misaka na ngadto sa 29-1, 25 KOs nga record, samtang si Elorde mius-os sa 28-2, 15 KOs nga baraha.
Samtang didto sa Dignity Health Sports Park (kanhi Stub Hub Center) sa Carson, California, ang Cotabato native fighter Romero “Ruthless” Duno nagpabiling WBO NABO Lightweight champion human sa seven-round knockout nga kadaugan batok “American “Striker” Ivan Delgado.
“Akong masulti nga lig-on gyud si Romero (Duno), although naa pa siyay kulang pero every fight naa kini makat-onan. Happy ko sa iyang performance pero dili ko kontento daghan pa kuwang like combinations sa mga sumbag nya pagkuha og distance” matod pa sa Sugboanong trainer nga si Rodel Mayol sa dihang nahinabi sa Superbalita.
Ang garbo sa 2nd class Municipality of Tulunan, Cotabato province nga Duno misaka na ngadto sa (21-1, 16KO) samtang si Delgado nahagsa sa (13-3-2, 6KO). (Daniel Quindao Guden, US correspondent)