ANG pagkuha og driver's license sa online mao karon ang gitutokan sa Land Transportation Office (LTO) 7 human mismo ang regional director sa ahensiya ang mibutyag sa iyang Facebook account sa mga tawo nga nagtanyag niini sa Marketplace sa Facebook o ang mga Facebook Group nga naninda sa social networking site.
Si LTO 7 regional director Victor Emmanuel Caindec nibutyag nga “Fake” kining gitanyag nga mga driver’s license sa Facebook.
“If wala ka niadto sa LTO to apply and passed the exam, sure na nga fake,” si Caindec nagkanayon.
Dugang ni Caindec nga ilaha na kining gitaho sa National Bureau of Investigation (NBI) aron maimbestigahan kini.
“Constantly monitored na man na sila sa NBI. Hulat na lang ta madakpan.”
Sa Facebook post ni Caindec, gibutyag sila si Mae Cyrille Generalao nga nitanyag sa maong lisensya sa Cebu Tindahan ug si Mike Laetner nitanyag sa Online sa Tindahan sa Mandaue.
“Unsa kaha maayo buhaton ani nila? Dili man gyud mo undang. Pwede ba kaha ni ipa “ads” na lang ni sila sa mainstream media? Kay madakpan mo-bail ra man dayon. Cash pa. Business is booming ni sila,” sa FB ni Caindec. (HBL)