TALIWA sa kahadlok, ang 9-anyos nga bata nisumbong sa iyang inahan bahin sa gibuhat kaniya sa iyang 39-anyos nga ama-ama niadtong Miyerkules, Septiyembre 11, sa alas 6:00 sa buntag sa panimalay sa Barangay Tulay, lungsod sa Minglanilla.
Apan ang bata nga tinun-an sa Grade 5 sa publikong tunghaan sa pagkaugma na, Huwebes, Septiyembre 12, nakaako sa pagsulti ngadto sa iyang inahan tungod sa iyang kahadlok sa hulga sa ama-ama.
Tumang kalagot sa inahan human nasayod sa linuog nga buhat sa iyang kapuyo ug daling nisumbong sa kapulisan.
Si Patrolman Roy Mejares sa Minglanilla Police Station, nahinabi sa Superbalita Cebu. niingon nga ang kapulisan nilusad dayon og hot pursuit operation ug ang suspek nga ama-ama nga usa ka drayber sa trak, nasikop sa susamang adlaw, Huwebes, sa hapon sa usa ka dapit sa lungsod ug gibalhog sa bilanggoan.
Niadtong Biyernes sa buntag, Septiyembre 13, ang suspek nga ama-ama gipasakaan na og kaso nga pagpanglugos ug kalapasan sa Republic Act 7610 kun An Act Providing for Stronger Deterrence and Special Protection Against Children.
Sumala sa asoy sa bata ngadto sa iyang inahan ug imbestigador sa kapulisan, nga sayo nilakaw ang iyang inahan niadtong higayona ug siya lang uban sa iyang ama-ama ang nabilin.
Matod sa bata, gitawag siya sa iyang ama-ama, apan nilugnot siya. Dihang gihuboan ug gisabak sa ama-ama, nigawas ang kinatawo niini.
Walay nahimo ang bata sa kusog sa ama-ama ug nilampos kini sa linuog nga buhat.
Matod pa, ang bata igo lang sa paghilak sa kasakit sa iyang gidangatan. Nakompirma nga nakuha ang pagkaputli sa bata human gihiling sa Pink Room sa Vicente Sotto Memorial Medical Center (VSMMC).
Apan, matod ni Mejares, ang suspek nga ama-ama nihimakak sa alegasyon sa bata.
Ang Superbalita Cebu wala mobutyag sa ngalan sa biktima ug inahan aron pagpanalipod kanila gikan sa publiko.
Samtang, wala usab gibutyag ang ngalan sa amahan aron dili indirektang mailhan ang biktima nga menor de edad. (B)