SUPERBALITA CEBU

Sugilanon: Buwan sa Mayo ug Disyembre

ERLANDO LIGAN MAJAN

Barangay Hipodromo, Cebu City

NAHISAMA sila sa buwan sa Mayo ug Disyembre. Siya si Uldarico sa buwan sa Disyembre, ang buwan nga katapusan sa tuig. Samtang si Mary Grace mao ang buwan sa Mayo, ang buwan sa tingpamuwak, namuklad sa katahom ug kaamyon.

Tiguwang na si Uldarico, kapin sa kan-uman ang panuigon.

Part time college instructor sa usa ka unibersidad.

Ug dili siya makatuo nga may batan-ong babaye nga makagusto kaniya ug iya pa gyud nga estudyante.

Unsa pa bay paabuton niya sa matag tuig? Buwan siya sa Disyembre, maghinapos na sa kalendaryo. Nagkabuwag siya sa iyang asawa tungod sa ilang kalisod ug kawad-on. Nawad-an siyag trabaho sulod sa dugayng panahon.

Nagpaulipon ang iyang asawa sa sapian niining mga igsuon ug gisagop sa hingpit. Ang ilang mga anak nag-iyahay pagpangitag trabaho ug negusyo. Sarang lang ang kinitaan alang sa ilang tagsa-tagsa ka banay. Napasagdan siya sa mga sakop sa iyang banay. Nag-inusara na lang siya. Maskin gamay ra ang pensiyon nga iyang madawat sa Social Security System, nagdaginot siya ug nakatungha nga scholar sa graduate school sa usa ka state university. May master’s degree siya ug nakatrabaho nga part time college instructor bisan tiguwang na ug angay na untang moretiro sa hingpit.

Pait ang iyang kahimtang. Manglaba, magluto, mangumpra, mobiyahe, magtuon sa mga basahon ug magtudlo matag adlaw sa iyang mga tinun-an sa tunghaan.

Wala niya damha nga may estudyante nga nakagusto kaniya. Wa siya masayod ug wa makasabot kon unsay nagustoan sa iyang estudyante diha kaniya. Nalibat man tingali sa gugma.

“Tinuod lagi, Sir, I love you,” matod pa sa iyang estudyante. “Ayaw paglikay-likay. Sir, kay ibutyag ko unya ang tanan sa katawhan.”

Nakuyawan siya. “O, sige, taguon ta kini. Magkarelasyon lang kita kon makatapos ka na sa imong pagtuon karon ug makakaplag og trabaho sa umaabot. Nagkasinabot ba kita niini?” giingnan niya ang estudyante.

Lansis ra kadtong iyaha aron way eskandalong mahitabo.

Milabay ang panahon. Gipatungha si Mary Grace sa laing unibersidad kay may nakapanabi sa mga kadugo niini. Ug nalimot na si Uldarico sa mga nangagi.

Kapitoan na ang panuigon ni Uldarico. Nakatigom siyag sapi ug nagnegosyo na lang. May agrivet store siya ug namuhig hayupan.

Nagmagul-anon siya. Nitaliwan na ang iyang asawa sa laing kinabuhi. Kinsay moatiman kaniya kon angu-anguhon na siya?

Takulahaw lang may mitunga sa iyang tindahan, may migakos ug mihalok kaniya.

“Miuyon ang mga ginikanan ko nga makigkita ako kanimo. Maestra ako sa publikong tunghaan. Ug nahibaw-an ko nga nabiyudo ka na diay. Mahimo na kitang maminyo, di ba?”

Nahimuot si Uldarico. Nakatuaw siya sa hilom, “Tapos sa Disyembre, mobanos na usab ang buwan sa Enero.” (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph