SUPERBALITA CEBU

Nadela: Libreng sakay sa Mactan-Mandaue Bridge

GAWAS sa isyu sa mga bisiklita nga motabok sa Mandaue-Mactan Bridge lakip nga gituki mao ang mga tawo nga magbaktas sa maong tulay. Naglabi kanila mga tinun-an.

Saksi ko sa makadaghang higayon kong unsa ka pait ang kahimtang sa mga tinun-an nga magkadusingot sa pagbinaktas padung og gikan sa ilang eskwelahan. Usahay maabtan pa og ulan. Ang akong gipasabot mao ang mga tinun-an sa University of Cebu Lapu-Lapu-Mandaue Campus.

Ang mga gidili sa maong tulay nga gustong ipatuman sa Board nga nagdumala sa tulay gipa-review ni Gob. Gwen Garcia tungod sa mga reklamo.

Sa akong pangagpas mahibalik sa naandan ang tanang kisaw ibabaw sa tulay. Pero asay maayo kong hatagan nato og kahulogan ang kaluoy nga atong gibati ngadto sa nagbaktas nga mga tinin-an ug mamumuo.

Ako nga nakasulay na og baktas didto atol sa mga coverage nga akong giapilan kaniadto, gustong moduso og usa ka sugyot. Para ni sa kadagkuan sa Lapu-Lapu City nga gipangulohan ni Mayor Ahong Chan.

Asay maayo nga imbes magsud-ong ta nila nga nagbaktas ato nalang ni silang pasakyon og libre. Libreng sakay sa tanang motabok sa tulay, pinaagi sa shuttle bus nga mopasakay nila gikan sa tiilan sa tulay habig sa Lapu-Lapu City padung sa pikas tumoy habig sa Mandaue City. Mubo ra kaayo ang maong biyahe apan dako kaayo ni og kahulogan sa mga makabenepisyo. Mahimo kaayo ning buhaton sa mga oras nga mopadung o gikan sila sa eskwelahan o trabahoan.

Sa ingon niini nga paagi malayo sila sa peligro di ba? Ang magbisiklita apil sab nga benepisyo. Ang shuttle bus mahimong buhatan og desinyo aron nga makarga ang ilang bisiklita. Ang libre nga biyahe sa mubo kaayo nga ruta maoy mopapas sa tanang isyu sa maong tulay. Sa dry run pa lang sigurado ko nga hangpon ni sa mga tawo nga magbaktas matag adlaw.

Depende ra gyud na sa mga hingtungdan basta sa akong ubos nga pagtuo di bug-at para sa gobyerno kining maong sugyot.

***

Apas sumpay sa atong Asoy sa miaging Sabado, gusto sab nakong hisgutan ang talagsaon nga baruganan ni Joe Veloria, retiradong taxi driver.

Makadaghan na ta makadungog nga daghang taxi driver ang mobalibad mopasakay og mga samaron. Sama sa biktima sa pusil o disrasya sa kadalanan. Di sab ta ka basol nila basin kong gidili ni sa ilang operator. Sa mga kasayuran nga akong nahagdaw, kini si Joe ilado kaayo nga mokarga og mga samaron.

Gani dihay usa ka higayon nga gipara siya kay may biktima sa pagpamusil nga nagbuy-od sa dalan. Human makarga diha say lain nga nipara kay may nagkadugo nga pasyente nga ikarga. Tungod kay emergency wa sab niya balibari.

Sa sud sa iyang taxi iyang nasayran nga pulos kontra diay ang duha. Matod ni Joe di siya makaako pagbalibad sa mga biktima nga gustong magpahatod sa tambalanan. Sahi ra sab gud kong kitay balibaran. Karon nga ni-retire na si Joe padayon gihapon niya kining gihimo.

Gani nisamot pa ka daghan ang iyang naalagaran. Ang taxi nga iyang naimpas pinaagi sa gitawag nga data-abang, mao ra gihapon ang iyang gigamit paghatod sa mga pasyente sa tambalanan.

Sa iyang mga silingan diha sa Lagtang proper sa Talisay City makasulti ning talagsaon nga serbisyo nga way bayad. Karon kay tua naman siya mograhe sa sitio Iba sa mao gihapong barangay, padayon gihapon ang maong serbisyo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph