Magtiayon 3 ka adlaw sa dagat

Magtiayon 3 ka adlaw sa dagat

TULO ka adlaw nga nagpalutawlutaw sa kadagatan ang magtiayong Samuel ug Olympia Caldino, kinsa missing samtang nanagat sa Oslob, habagatang Sugbo, niadtong Biyernes sa kaadlawon, Septiyembre 13, 2019.

Niadto nang Dominggo sa alas 4 sa hapon, nabangalan nga luya na, sa mga mananagat sa lungsod sa Albuquerque, Bohol ang magtiayong Caldino, kinsang bangka nga nabuslot gihigot sa payaw aron di na sila anuron pa sa dagkong mga bawod.

Dali silang gidala sa baybayon dayon ngadto sa Bohol Provincial Hospital sa Dakbayan sa Tagbilaran.

Sila si Samuel, 52, ug Olympia, 45, taga Barangay Lagunde, Oslob, habagatang Sugbo, nibiya niadtong Biyernes sa kaadlawon pasado alas 2 sa kaadlawon aron managat bisan di maayo ang panahon tungod sa nagpadulong nga bagyong Marilyn.

Apan ang magtiayon nipadayon sa ilang panaw sa pamasin nga makakuha og isda aron dunay mabaligya si Olympia nga magamit sa ilang panginahanglanon.

Ang lima ka mga anak sa magtiayong Caldino nagpaabot ug mibati na og kabalaka human nga wa na makabalik sa baybayon nga naandan untang modunggo matag alas 8 sa buntag gikan sa ilang pagpanagat.

Tungod sa kabalaka sa mga anak sa ilang mga ginikanan, ang kamaguwangang anak nangayo na og pakitabang sa konsehal sa ilang barangay nga ila usab nga silingan sa barangay.

Si Oslob, Lagunde barangay councilor Elsa Gifwold nipahibawo sa Superbalita Cebu sa Dominggo sa gabii, Septiyembre 15, nga nabangalan ang magtiayon nianang alas 4 sa hapon sa samang adlaw.

Dugang ni Gifwold nga si Oslob Mayor Jose Tumulak nihatag og ayuda human mahibawo pinaagi sa sa Superbalita Cebu sa nahitabo sa iyang konstituente.

Sa ilang paglarga ugma paingon sa dakbayan sa Tagbilaran sa Martes, Septiyembre 17, duna nay mokuyog kanila nga duha ka mga sakop sa Municipal Disaster Risk Reduction Management Office (MDRRO) nga gipadala sa ilang mayor ingon man usa ka sakyanan sa munisipyo nga aron mahiluna ang duha ka mga magtiayon.

Mosakay sila sa usa ka commercial vessel gikan sa lungsod sa Argao paingon sa Tagbilaran, Bohol.

Niabaga usab sa ilang biyahe ang Philippine Coast Guard Cebu station.

Si P/Ssgt. Joel Echaves sa lungsod sa Albuquerque nga nahinabi sa Superbalita Cebu niingon nga ang magtiayong Caldino didto na nabangalan sa kadagatan taliwa sa Panglao ug OIslob.

Luya na ang duha nga way kaon samtang sakay sa ilang nabuslot nga bangka.

Gitabangan og bira sa mga mananagat ang ilang gisakyan nga pumpboat ngadto sa baybayon ug daling gidala sa Bohol Provincial Hospital.

Samtang si PCG spokesman Michael John Encina niingon nga human nila makadawat sa impormasyon, dali usab nga nihimo og rescue operation ang ilang kaubanan sa lungsod sa Oslob.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph