NIGRADWAR sa Alternative Learning System (ALS) ang 38 ka mga kanhi sakop sa New People's Army (NPA) sa 4th Division Training School (4DTS), Camp Osito Bahian, Malaybalay City, Bukidnon niadtong Septiyembre 13.
Gipangulohan mismo sa Department of Education (DepEd)-Northern Mindanao pinaagi ni Rey Butch Mahinay ang maong pag-gradwar sa mga kanhi sakop sa NPA nga nagagikan sa Northern Mindanao ug Caraga nga gilangkoban sa Higaonon, Talaandig, Manobo, Banwaon, Surigaonon, Umayamnon, Cebuano ug Mamanwa.
Giingong 15 niini ang nakumpleto na ang ilang elementarya samtang 23 ang nigradwar sa programa sa high school.
Nasayran nga nagpahigayon ang tinugyanan sa DepEd og klase sa kampo sa mga militar ug bisan sa mga panggabii nga klase aron nga ang mga estudyante makakuha sa Assessment and Evaluation nga eksaminasiyon.
Giingong ang maong 38 ka mga nigradwar kauban kini sa 110 ka ALS nga mga estudyante nga nipasar sa Assessment and Evaluation.
Sa pakighinabi ngadto na kay Captain Ryan Layug, tigpamaba sa 403rd Brigade nga mga sundalo na kini nga mga kanhi sakop sa NPA hinungdan nga gihatagan og kahigayonan nga makahuman sa pagtungha ug makatrabaho.
"Mao na ang kagustohan ni President Rodrigo Duterte but para matabangan nato sila nga ma comply ang requirements, gusto namo nga magpadayon ang ilang serbisyo labi na ang mga bata-bata pa that's why we're finding ways nga mahimo silang qualified," matud ni Layug.
Gidugang pa nga nakig-partner kini sa DepEd ilabi na nga nahikawan sila kaniadto sa pagtungha nga anaa pa sa kabukiran.
Nagpagawas usab og pahayag ang usa sa mga nigradwar nga kanhi NPA.
"Ang NPA ang hinungdan nganong wala mi kahuman ug eskwela, sulod sa 20 kapin ka tuig nga pagpangalagad nako sa NPA ilang giguba ang among kaugmaon. Dako ang among pagpasalamat sa gobyerno ilabi na kang Tatay Digong nga gitagaan mi og chance nga masugid ug bag-ong panginabuhian. Bisag 34 nako proud ko nga finally nakadawat nako sa akong diploma, akong bahandi nga dili na makawat nako,” emosyonal nga pahayag sa usa sa mga kanhi NPA.
Samtang gibutyag usab ni Brigadier General Edgardo De Leon, commander sa 403rd Brigade sa Bukidnon, nga padayon ang gobyerno sa pagluwas sa mga nasaag ilabi na sa mga na-recruit nga mga estudyante sa mga komunista diha sa mga tunghaan aron nga mabalik kini ug makahuman sa pagtungha.
Kini pagmatuod lamang nga ang gisaad ni Presidente Rodrigo Duterte nga bag-ong kinabuhi alang sa mga nibalik sa sabakan sa gobyerno dunay kamatuoran.
“Ang inyong pagtatapos sa araw na ito ang magsisilbing pruweba na ang pangako ng Pangulo na bagong buhay para sa mga rebeldeng nag surrender ay may katotohanan,” mensahe ni De Leon.