MAGSAYSAY, Davao del Sur -- Nabalaka na ang pamilya sa usa ka 19-anyos nga dalaga human wa makalahos pag-uli sa sa ilang balay.
Nasayran nga nagtrabaho isip katabang sa panimalay didto sa kaulohang Manila si Roselyn Tamba Saban, molupyo sa Barangay Maibo, ning lungsod.
Miuli ang dalaga niadtong Septyembre 8, kuyog matud pa ang iyang uyab nga langyaw, kay buot niining surprisahon ang iyang ginikanan ug mga igsuon.
Banda alas 9:00 sa gabii dihang nanawag kini sa iyang maguwang nga babaye aron magpahibawo nga nakahawa na sila sa Francisco Bangoy International Airport sa Davao City sakay sa usa ka sakyanan nga gi-rentahan og P25,000.
Padung matud pa sa lungsod sa Bansalan si Roselyn ug ang uyab niini diin naghuwat ang iyang mga igsuon ug inahan.
Apan uwahing natawgan sa igsuon si Roselyn diin gitataw niini nga anaa na sila sa utlanang bahin sa lungsod sa Sta. Cruz ug dakbayan sa Digos.
Dako na lang ang katingala sa pamilya human wa na makontak ang dalaga human sa uwahing tawag.
Gumikan niini, hilabihan ang gibating kabalaka sa pamilya mao nga nagpakitabang na sila sa kapulisan sa lungsod aron masubay kon unsa ang nahitabo kanila.
Ang kapulisan sa Magsaysay nanawagan sab ngadto sa mga nakakita sa nahimutangan sa mga nahisgutan nga ipahibawo gilayon ngadto sa ilang istasyonan. (Orlando B. Dinoy)