STO. TOMAS, Davao del Norte -- Niagulo sa kasakit sulod sa balay tambalanan ang usa ka waitress nga giluba og buak nga botelya sa kauban sa trabaho sa Menzi, Barangay Tibal-og sa maong lungsod, alas 9:30 sa gabii niadtong Sabado, Septyembre 14.
Ang biktima giila sa kapulisan nga mao si Angelina Agbon Andresan, 31, dalaga, ug molupyo sa Menzi, Barangay Tibal-og.
Sa report nga nakuha gikan sa Davao del Norte Police Provincial Office, nasayran nga nagkalalis ang biktima ug ang kauban niyang waitress sab sa gitrabahoang videokehan nga nailhan sa pangalang alyas Icy.
Matud pa nga nagkainitay ang pagbinayloay og mga mahait nga mga pung sa duruha apan kalit nga nikuha og buak nga botelya si alyas Icy ug giluba ang biktima.
Nasamdan ang biktima sa tuong bukton ug gidali pagdala ngadto sa Sto. Tomas Health Center apan wa madugay gibalhin ngadto sa Davao Regional Medical Center sa siyudad sa Tagum.
Samtang ang suspek human sa insidente mikagiw palayo paingon sa direksiyon sa FD RD 2, Sto. Tomas. (Dexter T. Visitacion)