NAANGKON sa Spain ang gold medal human nila gipangmakmak ang Argentina, 95-75, sa finals niadtong Dominggo sa gabii sa FIBA 2019 Basketball World Cup sa Beijing, China.
Mao kini ang ikaduhang gold medal sa Spain ning maong matag upat ka mga tuig nga kompetisyon.
Una kini nilang nalangkat niadtong 2006 sa Japan.
Si Ricky Rubio, kinsa maoy napiling MVP sa kompetisyon, maoy nangulo sa kadaugan pinaagi sa iyang 20 puntos, nidugang og 15 puntos si Sergio Llull samtang niamot og 14 puntos si Marc Gasol.
“We weren’t the most talented team,” Rubio, kinsa kasamtangang nagduwa sa Phoenix Suns sa National Basketball Association (NBA).
“We weren’t the bigger team. Put anything you want, but we were the team with the biggest heart and we showed it tonight and we showed it during the whole tournament.”
Alang kang Gasol, kinsa sakop sa kasamtangang NBA champions Toronto Raptors, dili niya makalimtan kining maong kalampusan tungod kay nagpahumitang kini kaniya sa kasaysayan.
Si Gasol mao pa lang ang ikaduhang magduduwa nga nakalangkat og NBA title ug World Cup gold medal sulod lang sa usa ka tuig.
Ang premirong nakahimo niini mao si Lamar Odom, kinsa sakop sa Los Angeles Lakers nga ningkampiyon ug Team USA nga naghari sa World Cup niadtong 2010.
“NBA champion and a World Cup champion as well,” matod ni Gasol. “What can I say? How does it sound to you? I feel very fortunate to be in this position and be able to play this game and help these guys be part of history of Spanish basketball.”
Ang Argentina, nga wala’y aktibong magduduwa sa NBA sa ilang puwersa, dili maayong nakasugod sa duwa ug wala na gyud kini nakabawi hangtod na sa katapusang gutlo.
Gipangulohan ni Gabriel Deck ang Argentina pinaagi sa iyang 24 puntos.
Ang usa sa labing sinaligan sa Argentina nga si ex-NBA Luis Scola igo lang nakamugna og walo ka mga puntos.
“We’re sad right now. We’re very sad,” matod ni Scola. “But I feel confident, in hours, we’ll be able to look back and be very proud. They just played better than us. They were better. They deserved to win. They were the better team in the game and the tournament.” (AP, ESL)