NING bag-o pa lang ganing pagsugod sa 2019 University Athletic Association of the Philippines (UAAP) season, mihinay-hinay na sa pagkulit og kaugalingong pangalan si Rey Suerte, ang kanhi lider sa University of the Visayas (UV) Green Lancers.
Niadtong Sabado gipakita ni Suerte ang iyang kahanas sulod sa korte aron giyahan ang iyang bag-ong team University of the East (UE) Warriors ngadto sa 89-88 nga kadaugan batok sa multi-titled De La Salle University (DLSU) Green Archers, 89-88.
Nag-ung-ong na gyud unta sa kapildihan ang Warriors human makaposte og 88-86 nga labaw ang Archers sa naghinapos nga bahin, apan ang iyang tres sa katapusang 3.2 segundos, atubangan sa hugot nga depensa sa La Salle, maoy mipalanog sa abiba sa ilang mga dumadapig sulod sa Mall of Asia Arena.
Gidumog sa tumang kalipay si Suerte sa iyang mga kauban sulod sa korte, samtang diwalwal sa dila ang gitubag ni acting coach Lawrence Chongson ngadto sa mga fans sa Green Archers.
Mitapos sa duwa si Suerte nga may 31 puntos, pito ka rebounds, tulo ka assists ug lima ka tres butang nga nakapahaom kaniyang mamahimong best player of the game.
Kadto maoy unang daog sa UE sulod sa upat nila ka duwa ug ikaduhang pildi nga naangkon sa Archers sa tulo nila ka assignments.
Sa gibuhat ni Suerte niadtong Sabado, dili malikayan nga usa na siya karon sa sentro sa atraksiyon sa UAAP, ang dalan nga mag-iwag na unya kaniya paingon sa katumanan sa iyang damgo – ang PBA.
Actually, wa sa rota ni Rey ang UAAP. Pipila ka higayon, sa atong pagpakighinabi kaniya, iyang giingon, nga human sa iyang gradwasyon sa UV sa kursong Business Administration, moduwa ug manimpalad siya sa D-League ug dayon sa Maharlika Pilipinas Basketball League (MPBL) sa dili pa siya mosalmot sa Drafting sa PBA.
Apan samtang nagduwa siya sa D-League pipila ka mga coaches didto sa Kaulohan ang nakaobserbar sa iyang dinuwaan, hinungdan nga nakadawat siya og mga tanyag gikan sa pipila usab ka mga Universidad.
Unang mihaylo kaniya mao ang UE ug dayon ang Far Eastern University (FEU) Tamarraws. Apan, mas gihatagan niya og gibug-aton nga mahitapo siya sa Warriors.
Usa sa mga migiya kaniya mao ang kanhi PBA star nga si Dondon Hontiveros, kinsa mitambag nga makaayo alang sa iyang karera ang pagduwa sa UAAP tungod kay mahatagan man siya sa saktong exposure.
Si Hontiveros maoy nahimong coach ni Rey sa dihang nakasalmot siya sa Chooks to go 3-on-3 sa Manila.
Tuod man, wa magpanuko ang lumad nga taga Moncayo, Campostela Valley Province, Davao nga makasul-ob sa puwa ug puti nga jersey sa UE. Ug tungod sa iyang gipakitang kalidad, nahimo siyang go-to-guy sa team.
Si Jade Mendoza, kanhi player sa NCAA nga karon anaa na sa UE, mihulagway sa lihok ni Rey (Suerte) nga kombinasyon sa abilidad ni Rey Nambatac ug Robert Bolick, samtang ang laing kauban ang mihulagway kaniya nga susama og lihok ni Keifer Ravena.
Sukwahi sa ubang team nga mitanyag kaniya, ang UE anaa man tuod sa ubos nga bahin sa standings, apan way angay ikabasol si Rey sa iyang pagpili niini, kay dinhi nakita ug misihag ang iyang abilidad nga maoy magyawe kaniya sa katumanan sa iyang damgo.
Keep up the good work, Rey. (jun.migallen22@gmail.com)