MGA duwa karon
5:15 pm- CITU batok CEC (High School)
6:45 pm- CITU batok USC (College)
Langkaton og suway sa University of San Carlos (USC) Warriors ang ikatulo nilang kadaugan sulod sa upat ka mga duwa sa ilang pagpakigbatok sa Cebu Institute of Technology University (CITU) Wildcats sa main game karong gabii sa CESAFI basketball college division sa Cebu Coliseum.
Ang Warriors ningsugod sa torneyo pinaagi sa overtime nga kadaugan batok sa USPF Panthers, 80-75, niadtong Septiyembre 1.
Apan human niini, ang Warriors nasugamak sa dakong kapildihan batok sa defending champions UV Green Lancers, 74-53, niadtong Septiyembre 12.
Hinuon ningbangon dayon ang Warriors ug namungot sila sa USJ-R Jaguars, 62-55, niadtong Septiyembre 14.
Ang Wildcats, nga maoy bugtong team nga wala’y import, mosagubang sa ikaduha pa lang nilang tahas.
Bisan wala sila’y import, ang Wildcats nakapanghudlat og maayo una sila ningyukbo sa Jaguars, 67-72, sa premiro nilang tahas niadtong Agusto 31 atol sa pagsugod sa torneyo.
Dili ikalimod nga inilog ang Warriors ning sangkaa apan kon molugak sila bisan gamay, delikadong makawrasan sila sa Wildcats.
Sa premirong duwa, magkombati ang CIT-U Wildkittens ug Cebu Eastern College (CEC) Dragons alang sa high school division.
Ang Wildkittens ug Dragons parehong naggunit og 1-1 nga rekord. (ESL)