GILANGKAT sa Sacred Heart School-Ateneo de Cebu ang ikaduhang nilang sunodsunod nga Passerelle title pinaagi sa pagpukan sa University of the Visayas, 68-61, sa finals sa Cebu leg sa Milo SBP-Passerelle Twin Tournament niadtong Dominggo, Septiyemnre 15, 2019 sa Alta Vista Country Club basketball court.
Nagmangtas ang Ateneo sa ikatulong quarter diin nila gimugna ang ilang 20 puntos nga labaw, 52-32.
Ning maong pagsutoy sa opensa sa Ateneo, nakahimo og 14-0 run sila si Michael Asoro, Jared Bahay ug Alden Cainglet.
Hinuon wala dayon moisa sa ilang puti nga bandera ang UV ug ningsuway kini paggukod hangtod nga napahak nila ang labaw sa Ateneo, 57-63.
Apan human niini, nagpabuto og three-point bomb si Bahay nga gisundan og laing duha ka puntos ni Joash Cutamora aron inaton og balik ang labaw sa Ateneo ngadto sa 68-57, sa nahabiling 1:45 minutos.
Wala na nakabangon ang UV gikan niadto.
Si Cutamora, kinsa nagpakatap og 12 puntos, maoy napiling MVP sa torneyo.
Sa laing bahin, naangkon sa Southwestern University-Phinma ang ikatulong dapit pinaagi sa pagbuntog sa University of San Carlos, 52-42. (JNP)