KINAHANGLANG mobiyahe paingon sa London si Filipino Johnriel Casimero alang sa iyang tinguha nga mahimong lehitimong three-division world boxing champion.
Kini gumikan kay midaog ang kampo ni World Boxing Organization (WBO) bantamweight champion Zolani Tete sa bidding alang sa pagepensa niini sa iyang korona batok kang Casimero.
Si Queensberry Promotions head Frank Warren, kinsa maoy representante ni Tete, mitanyag og $301,000 samtang ang TGB Promotions igo lang mibungat og $258,500 alang kang Casimero.
Human sa bidding, si WBO president Paco Valcarcel mianunsyo nga kinahanglang mapahigayon ang away duha ka mga buwan gikan karon.
Sa inisyal nga gikasabutan, gikatakda ang away karong Nobiyembre 23 sa wala pa matino nga venue sa London.
Ang kampo ni Casimero nagtinguha unta nga mapahigayon ang away sa Amerika kon midaog pa sila sa bidding.
Hinuon matod ni Casimero sa interbyu sa Spin.ph nga dili problema lang kaniya ang pag-asdang sa London.
Si Casimero, 29, gikan sa iyang 10-round nga demolisyon batok kang Mexican Cesar Ramirez niadtong Agusto 24 sa malampuson niyang pagdepensa sa WBO bantamweight interim title sa San Andres multi-sports complex.
Dili na bag-o alang kang Casimero ang pag-away sa London.
Niadtong 2016 una siyang miaway ning maong dapit diin mirehistro siya og 10th-round TKO nga kadaugan batok kang Charlie Edwards aron depensaan ang iyang IBF flyweight title.
Sa iyang bahin, mao kini ang labing unang away ni Tete gikan sa iyang kadaugan batok kang Mikhail Aloyan sa quarterfinal bout sa World Boxing Super Series (WBSS) sa miaging tuig.
Sa semi-final bout sa WBSS, nakatakda untang makigharong si Tete batok sa laing Pinoy nga si Nonito Donaire apan wala kini madayon gumikan kay naangol ang abaga ni Tete Bag-uhay lang natugtan nga makaaway og balik si Tete.
Si Casimero adunay 28-4, 19 KOs) nga rekord samtang si Tete naggunit og (28-3, 21 Kos) nga baraha. (ESL)