NASIKOP sa mga sakop sa Cordova Police Station pinaagi sa buy-bust operation ang usa ka tawo nga nakapahimus sa Good Conduct Time Allowance (GCTA) sa Lunes sa udto, Septityembre 16.
Ang dinakpan nailhang si Billy Bixby Castañeda Regner, 35, lumad nga taga dan Bonifacio, Brgy Parian, dakbayan sa Sugbo, apan kasamtangang nagpuyo sa Sitio Camino, Brgy, Gabi, lungsod sa Cordova.
Si Police Corporal Ritche Abao, imbestigador sa Cordova Police Station nga si Regner gikonsiderar nga high value target (HVT) sa ilang area of responsibility (AOR).
Giingong maka-dispose siya og 5 ngadto sa 10 ka gramos matag semana ug sa dakbayan sa Sugbo magkuhaan sa iyang supply sa ilegal nga drugas.
Ang balay sa kapuyo niining si Nancy Ababa Aballes maoy gi-estaran sa dinakpan sa lungsod.
Si Aballes gilakip pagsikop sa kapulisan lakip na ang duha nga giingong naaktohang nipalit ug ang bata-bata ni Regner.
Ang duha nailhang sila si Ludivico Batiancilla Sitoy, taga Poblacion ug Jose Rowen Encallado Macan, taga Datag.
Nakuha sa posisyon ni Regner ang duha ka mga pakete sa gituohang shabu, duha ka Nubain ampules, usa ka syringe, usa ka basiyo sa Nubain, toter, duha ka ka syringes ug timbangan.
Samtang nakuha sa posisyon ni Sitoy ang duha ka mga pakete sa gitouhang shabu ug tagsa ka pakete usab kang Aballes ug Macan.
“Nubain ug shabu ni iya tirada unya moabot ni og one month among surveillance,” matod ni Abao.
Si Regner nga nakagawas sa New Bilibid Prison sa Muntinlupa pinaagi sa GCTA niadtong Mayo 2017 nibutyag nga igo ra niya personal nga gamit ang drugas, wala siya mamaligya. (GCM)