COUPON system na ang pamaagi sa pagpalit sa pang adlaw-adlaw nga panginahanglanon karon sa mga piniriso sa Bureau of Jail Management and Penology (BJMP) – Mandaue Male Dormitory.
Kini gihimo nga pamaagi sa hepe sa prisohan, Jail Superintendent Gil Inopia, aron mapugngan ang pagsulod sa mga kontrabando ingon man ang pag monitor sa kwarta nga mosulod sa prisohan.
“Kini sad aron maka-monitor ta kon unsay gamit sa ilang kwarta kay basig gamiton na og di maayo. Kahibaw na baya ta aning kwarta usahay ingnon lang nga naay bayaran lahi na diay nga transaksyon,” matod ni Inopia.
Buot pasabot ini, dili na makagupot og kwarta ang mga piniriso.
Nagsugod sa P5 ang kinamenosan ug P1000 usab ang labing taas nga denominasyon sa coupon.
May P2,000 usab nga kantidad apan magamit lang kon mopaubos ang mga piniriso sa Drug Dependency Examination (DDE).
Ang tanan nga modalaw nga may dala nga kwarta o allowance alang sa mga piniriso moagi una sa desk sa BJMP personnel nga maoy moilis sa kwarta, matag Martes, Huwebes ug Dominggo.
Hinuon gitugutan gihapon sa BJMP ang paggamit og sinsilyo nga magamit sa pagpalit og tubig.
Sa wa pa gipatuman ang sistema matod ni Inopia nga mipahigayon sila og operasyon pag-confiscate sa kwarta sa mga piniriso ug gi-turnover sa pamilya o kabanay niini.
Matod ni Inopia nga sa padayon nga greyhound operations sa sulod, kon duna man gani masakmit nga kwarta mag atubang ug tukmang silot ang piniriso. (ANV)