SUPERBALITA CEBU

Tubig sa pipila ka dapit sa Lapu-Lapu, Cordova nihit

TUNGOD sa saltwater intrusion ug paghubas sa pipila ka mga atabay, niluwat na og store water advisory ang Metropolitan Cebu Water District (MCWD) ngadto sa ilang mga konsumidor sa Dakbayan sa Lapu-Lapu ug Cordova.

Subay niini, gibutyag sa MCWD nga usa sa planta sa private bulk supplier niini sa Suba-Basbas, Lapu-Lapu City, nihunong na pag-supply kanila sa 3,500 cubic meters matag adlaw karong Septiyembre.

Lakip sa apektado niini mao ang mga konsumidor sa MCWD sa Babag, Marigondon, Maribago, Mactan, Punta Engaño sa dakbayan sa Lapu-Lapu ug ang tibuok lungsod sa Cordova.

Gitambagan kining mga apektado nga konsumidor nga magpundo og tubig tungod kay aduna’y oras nga hinay ang agas ug dili kini permi.

“MCWD is encouraging affected consumers to store water during the off-peak hours from midnight to 5 a.m when the demand is low,” tipik sa press release sa MCWD.

‘Pangitai og paagi’

Nanghinaot karon si Lapu-Lapu City Mayor Junard Chan nga mapangitaan og solusyon sa MCWD ang suliran sa tubig sa pipila ka mga barangay sa dakbayan hilabina ang mga dapit diin anaa ang mga resort mahimutang.

Gibutyag ni Chan nga atol sa iyang paglingkod isip mayor sa dakbayan, nakigtagbo siya sa MCWD alang sa posibleng solusyon sa naasoyng suliran sanglit hagbay ra kini nga nasinati bisan niadtong di pa siya ang mayor sa dakbayan.

Iyang gihulagway ang Brgy. Punta Engaño nga maoy labin atimanonon kalabot sa suliran sa tubig sanglit di maabot ang barangay sa agas sa tubig.

Apan giingong wa mopasalig ang MCWD nga masulbad ang suliran sulod sa 100 ka adlaw sukad sa iyang paglingkod isip mayor nga maoy iyang hangyo.

Sumala ni Chan nga giingong misaad ang Mactan Rock Industries, kinsa adunay water treatment facility sa dakbayan sa paghatag sa MCWD og 8,000 cubic meter aron makaabot ang supply sa tubig sa Brgy. Punta Engaño apan magdepende ra gihapon kini sa ilang sabot unya sa MCWD sa pagmontar og linya ug koneksyon sa tubig sa kabalayan.

“If they can add more the better kay dili ta gusto nga maapektuhan ang operasyon sa city especially sa business side,” matod ni Chan.

Nakigtagbo

Aron masulbad kining problema sa kanihit sa tubig sa isla sa Mactan, nakigtagbo na ang MCWD sa Mactan Rock Industries Inc., nga anaay planta sa Gabi, Cordova nga umentuhan pa niini ang produksyon ug ang supply ngadto sa 5,000 cu.m. matag adlaw.

Samtang gipahibawo usab sa MCWD nga nikunhod na usab ang gidaghanon sa ma-supply sa Buhisan dam.

Anaa nalang kini karon sa 3,000 cu.m. matag adlaw gikan sa 7,000 cu.m. nga normal nga supply matag adlaw.

Dihang nag-weak El Niño karong tuiga, nag-zero ang production niini niadtong Marso ug naka-recover niadtong Hulyo.

Sa pagkakaron, nagsalig ang MCWD sa supply niini sa Jaclupan Facility nga nagkuhaan og tubig sa Mananga River.

Hinuon niaprobar na ang Pilipinas Water Resources Inc. sa tanyag sa MCWD nga dugang 5,000 cu.m. matag adlaw ug maka-supply na kini og 10,000 cu.m. matag adlaw.

Lakip sa makapahimulos niini ang Mambaling, Inayawan, Cogon Pardo, Pardo, Quiot, Kinasang-an, Basak Pardo, Basak San Nicolas, Duljo-Fatima, Sawang Calero, Suba, Pasil, sa dakbayan sa Sugbo.

Agusto ning tuiga, niabot sa 13,000 cu.m. matag adlaw ang kuwang sa MCWD nga supply tungod kini sa paghubas sa atabay sa Consolacion. (HBL, GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph