MAPASALAMATON nga hingpit na nga naagian ang taytayan sa Mananga human sa hapit usa ka tuig nga pagtrabaho, apan ang mayor nipahinumdom sa ahensiya nga dili na mausab ang kalangay.
Nipadayag sa iyang kalipay si Talisay City Mayor Gerald Anthony Gullas nga niadtong Septiyembre 14, Sabado sa buntag, naagian na sa hingpit ang taytayan sa Mananga sa Barangay Tabunok.
Ang pag-abli dako og makatabang sa pagsulbad sa problema sa paghuot sa trapiko sa maong lugar ug sa South Coastal Road (SRP).
Apan pabilin ang pahinumdom sa mayor ngadto sa Department of Public Works and Highways (DPWH-7) nga kon aduna pay mga proyekto nga ilang ipatuman sa siyudad angay lang ang insakto nga pagpakig-alayon ngadto sa lokal nga kagamhanan, ilabi na kalabot sa traffic plan matag higayon nga dunay proyektong ipatuman.
Giila sa mayor ang dakung tabang sa mga proyekto gikan sa nasyonal nga gipaagi sa DPWH, apan hangyo niya nga tumanon ang mga anaa sa plano niini.
Sama sa plano kon kanus-a mahuman, nga tumanon kini ug mapasabot ang kagamhanan aron mapahibalo ang publiko kalabot sa proyekto ug sa mga maapektuhan nga rota o agian.
“Nalipay lang ko na-open na gyud ang Mananga, hopefully lang, moving forwardwith DPWH the region or the second engineering district nga kun naa mga projects atong i-implement sa City, you coordinate with the City, so that we can find a good time table to when this should be done and a clear traffic plan kon unsay angay nga buhaton kon naa moy i-implement sa siyudad,” pagpasabot sa mayor sa Superbalita Cebu. (FMD)