DUHA ka mga panimalay ang nangaugdaw human gilamoy sa kalayo sa managlahi nga barangay nga girespondehan sa Cebu City Fire Department (CCFD).
Si SFO3 Lowell Opolentisima, chief investigation section sa CCFD nga nahinabi sa Superbalita Cebu niingon nga duha ka mga balay ang gilamoy sa kalayo sa duha ka buwag nga insidente sa sunog.
Unang gitubag sa mga bombero ang sunog nga mi ulbo sa Sitio Huya Phase 2 Barangay Tisa, nadawat ang alarma sa sunog sa alas 8:58 sa gabii ug napalong human sa usa ka oras kapin sa kombati sa kayo.
Matud ni Opolentisima nga wala na ka padagan ug tubig ang niresponde nga bombero tungod sa layo sa dapit gikan sa sentro nga bahin sa barangay, diin walay nakasaka nga fire truck tungod sa katungason sa dapit.
Gibanabana nga moabot sa P5 mil ang danyos sa sunog sa payag nga gipag-iya sa usa ka 'Ramil' nga giingong nalisoan sa pangisi.
Si Ramil daling gidakop sa mga barangay tanod sa dihang nasakpan nga nagdala og kutsilyo.
Samtang, laing sunog ang niulbo sa alas 12:30 sa kaadlawon kagahapon, Lunes, Septiyembre 16, sa Santo Nino Village, Barangay Banilad. ning siyudad.
Ang alarma giisa sa third alarm sa pagka alas 12:37 sa kaadlawon.
Matud ni Opolentisima nga usa ka kongkretong balay nga dos andanas ang naugdaw ug ang kayo gikan sa ikaduhang andana nga kwarto sa tag iya nga si Ceasar Betansos, hingkod.
Padayong gisusi pa ang hinungdan sa sunog nga gibanabana nga danyos nga moabot og P150. (BBT)