ALANG sa nahabilin nga duha ka semana sa rehistrasyon sa Commission on Election (Comelec), nanawagan karon ang maong ahensiya nga magparehistro kining wala pa aron makabotar sa umaabot nga piniliay.
Samtang sukad nagbukas sila sa ilang rehistrasyon niadtong Agusto 1 hangtod Septiyembre 14, niabot na sa 26,434 ang nakaparehistro sa dakbayan sa Sugbo.
Ang pagpanawat og rehistrasyon, kutob nalang Septiyembre 30, gikan sa Lunes hangtod sa Sabado lakip na ang holidays.
Matod ni Election Assistant Omar Sharif Mamalinta nga sa 26,434, ang 10,879 niini gikan sa North District samtang 15,555 sa South District sa dakbayan sa Sugbo.
Dugang ni Mamalinta nga base sa ilang kasinatian kon duol na ang deadline diha na pud modagsa ang mga tawo nga gustong magparehistro maong adunay gihimo nga mga lakang ang COMELEC aron ang tanan modagsa sa ilang buhatan maakomodar.
“We make sure nga organize ang atoang flow sa pag-register duna tay different steps nga atong i-follow for as long as maka-assist ta sa pag-fill out sa ilang form in different types of application so wala’y problema mao ra gyud na tan-aw nato pinka lisod nga part sa pag-fill out sa form.”
Aron mahatagan og higayon ang katawhan nga makaparehistro ang Comelec adunay mga satellite registration ang gipanghimo sa ahensiya.
Sa North District karong Sabado, Septiyembre 28, dunay satellite voter’s registration nga mahitabo sa Barangay Cogon Ramos, aduna sab sa Barangay Sambag 1 ug isunod dayon ang ubang request gikan sa nagkalain-laing Barangays.
Panawagan sa Comelec sa tanan nga wala pa nakaparegister susama sa new applicants, application for transfer, reactivation ug magpa-correct sa data sa voter’s registration record mentras sayo pa moadto na sa buhatan sa Comelec aron pag-apply ug aron sab maka-exercise sa katungod sa umaabot nga eleksiyon. (HBL)