PAKIGTAGBOAN og balik ni Gobernador Gwen Garcia ang mga sakop sa Mactan-Cebu Bridge Management Board (MCBMB) sa dili madugay sa dili pa sila mohimo og pinal nga desisyon unsa ang mga polisiya nga ipatuman sa duha ka mga taytayan nga nagsumpay sa siyudad sa Mandaue ug Mactan island.
Gusto ni Garcia, chair sa MCBMB, nga motambong sa tigom si Lapu-Lapu City Mayor Junard “Ahong” Chan aron makasulti kini sa iyang mga concern aron makonsiderar sa bridge board sa dili pa mohukom.
Ang mayor sa siyudad sa Lapu-Lapu wa makatambong sa tigom sa MCBMB niadtong Septiyembre 10 sa Kapitolyo, apan nagpadala og representante, dihang giplanohan ang pag-limit sa pedestrian traffic ug pag-ban sa mga bisiklita sa Sergio Osmeña Bridge o mas nailhan nga unang Mandaue-Mactan Bridge ug sa Marcelo Fernan Bridge o ikaduhang taytayan.
Si Chan nabalaka sa plano tungod kay dunay mga tinun-an ang manglakaw padung sa eskwelahan agi sa taytayan samtang maapektuhan usab ang ubang mga trabahante.
Giklaro sa gobernador nga wala pay hukom ang board sa pagpatuman sa curfew ug ban sa mga bisiklita sa maong mga tulay gikan sa ala 1:00 sa kaadlawon hangtod sa alas 5 sa buntag sanglit ubos pa kini sa pag-review.
“Kon magsige sila diha og yawyaw kay if you notice wa pa man tay gi-implement diha di ba. And in fact, as I’ve said ang katong bike ban was under review. Pero kon moprotesta pa gyud sila kay gusto gyud sila kay magbisiklita on the bridge even if that is risk to their own safety and at a risk to other motorists, then that is really going beyond. That is way out of line na,” pahayag ni Garcia sa pakighinabi sa mga tigbalita niadtong Lunes, Septiyembre 16, 2019.
Midepensa ang gobernador batok sa mga nanaway sa ilang plano pagdili sa mga bisiklita sa duha ka mga taytayan.
Giawhag niya ang mga kritiko nga makisayod sa mga rason sa bridge board kon nganong nagplano kini idili ang mga bisiklita sa mga taytayan.
“But I wish instead of immediately commenting ba, they should first find out the whys. Ngano man to maoy nahuna-hunaan? Dili intawon mi mga clueless. Duna intawon mi kabasehanan nga data, those are the clues. Those are the evidences. We did not just raise our eyes to the heavens and suddenly decide ah atong butangan og curfew,” dugang ni Garcia. (SCG)