BISAN kon gideklarar na ang outbreak level sa African swine fever sa nasod, apan gipahibawo sa Department of Agriculture (DA) 7 nga wala pa kini makaabot sa Central Visayas.
Matod ni Atty. Salvador Diputado, DA 7 regional director, nga sa Luzon ra kining gihulagway sa Bureau of Animal Industry nga outbreak sa ASF. “Sa ila tingali didto, sa ato diri, wala pa. Focus lang ta sa ato, ningkamot ta di makasud diri,” matod ni Diputado sa Superbalita Cebu.
Lunes, Septiyembre 16, dihang gibutyag ni BAI Director Ronnie Domingo nga human sa pito ka dapit nga apektado sa ASF, anaa na sa outbreak level ang nasod subay sa maong sakit sa baboy.
Ang pito ka mga dapit anaa nahimutang sa Bulacan ug Rizal.
Gikompirmar hinuon ni Diputado nga wa pa’y kaso ang Central Visayas tungod sa padayon nga pagpugong nga makasulod ang maong sakit sa baboy sa rehiyon.
Sayo ning buwana dihang gikompirmar sa DA nga nakasulod na ang ASF sa nasod.
Ang maong sakit apektado ang baboy, diin kalit lang kini nga mangamatay.
Daan nang giawhag ni Diputado ang publiko nga kon aduna’y mabantayan nga kahibulngan nga pagkamatay sa mga baboy, i-report dayon sa awtoridad.
Gawas sa lakang sa pagpugong sa pagsulod sa mga baboy gikan sa laing dapit sa nasod hilabi na sa Luzon, gisakmit usab sa mga awtoridad ang canned meat aron di makasulod sa Central Visayas.
Makabalaka
Si Gobernador Gwendolyn Garcia nabalaka niini.
Apan matod niya nga mas maayo pang “over-cautious.”
“Maypa’g ma-alarm ta kaysa ma-panic. Dili na ta maghuwat nga mangamatay ang mga baboy usa pa ta mo-take action,” nagkanayon ang gobernador.
Mopatawag siyag emergency emergency meeting tali sa Provincial ASF Task Force aron pag-review sa protocols karon.
“Let us be on the side of caution, dili kay maabtan ta nga natulog sa pansitan,” dugang ni Garcia.
Gilantawan nga ang tigom mag-review mga lakang sa pagpugong nga hayan kinahanglan nga palapdan pa taliwa sa deklarasyon.
Si Garcia nimando niadtong Septiyembre 10 pinaagi Executive Order 15 nga nagpatuman og hingpit nga ban sa live hog supply gikan sa Luzon lang.
Iyang gitan-aw nga hayan magkuwang ang supply sa baboy sa Sugbo kon ilakip usab ang ubang mga dapit. (PR)