MOPADAGAN og 15 ka modernong unit sa bus-jeep (Beep) ang Cebu People’s Multi-Purpose Cooperative nga ilang gitawag og people’s jeep sa tulo ka mga rota sa Dakbayan sa Sugbo.
Kini kabahin sa public utility vehicle (PUV) modernization program ni Presidente Rodrigo Duterte.
Si Macario Quevedo, chief executive officer sa People’s Coop, nagkanayon nga human nila gilusad sa Lunes, Septiyembre 16, ang mga bag-ong PUV, mahimo nang mapadagan nga libre sa pletihan ang mga pasahero sa tulo ka mga rota nga adunay tag-upat ka mga beep sulod sa duha ka mga buwan.
Ang People’s Jeep mobiyahe sugod karon o ugma sa ilang rota gikan sa Talamban-Ayala- Colon ug Lahug-Ayala-SM.
Ang ikatulong rota nga nga gikan sa Bulacao-Colon-SM padayon pa nga gipangitaan og driver nga adunay professional driver’s license nga makamaneho og six-wheeled nga sakyanan.
Matag beep adunay kapasidad nga 35 ka mga pasahero.
Nakapasar
Si Reynaldo Elnar, assistant regional director sa Land Transportation Franchising and Regulatory Board (LTFRB) 7, nagkanayon nga ang maong mga unit nakapasar ug nisunod sa rekisito nga gilatid sa PUV modernization program nga adunay Euro 4 emission standard.
Dugang ni Elnar nga ilang hinayhinayon og patuman ang PUV modernization aron usab di makalitan ang mga operator ug mga pasahero sanglit di usab nila madungan og ilis ang tanang karaang unit sa PUJ gumikan sa kadaghan.
Ang beep dunay P10 nga minimum nga pletihan o 20 porsyentong mas taas sa naandang pletihan sa PUJ.
Ang unit adunay close circuit television camera (CCTV), global positioning system (GPS), speed limiter, dash camera ug mogamit na sila og card isip paagi sa pag-plete sa higayon nga mosugod na sila og kolekta, apan aduna gihapon silay passenger assistance officer.
Mapalit ang mga card sa ilang mga sangang buhatan ug mga outlet nga awtorisado sa People’s Coop. (PAC)