GIPA-ubos pa karon sa confirmatory testing ang giingong haze nga nasinati sa Sugbo diin makita sa bukirang bahin nga nahisama og gihabulan og panganod ang Sugbo.
Ang Environmental Management Bureau (EMB) 7 miklaro nga dili pa nila makompirmar kon haze ang nasinati karon sa Metro Cebu nga namatikdan sa bukirang bahin nga foggy o gabon ang dakbayan.
Matod ni Engr. Cindylyn Pepito-Ochea sa EMB 7, nga gitan-aw nila ang forest fire sa Indonesia nga maoy rason sa susamang haze sa Sugbo.
Si Ochea nagkanayon nga sa pagkakaron nasinati usab ang haze sa Indonesia, Malaysia, ug Singapore.
Sa pagkakaron nimando na si Engr. William Cuñado, regional director sa EMB 7 nga mohimo og air quality testing ang ilang team.
Gibutyag ni Ochea nga ang Particulate Matter o ang PM 2.5 nga abog sa hangin nga dili na makita sa tawo ang ilahang i-test.
Karong adlawa, Septiyembre 18, gikatakda nga moluwat sa resulta ang EMB 7 kon positibo nga haze na ning nasinate sa Metro Cebu.
Moluwat ra usab sila og advisory kon kinahanglan na nga mag-mask ang tawo aron dili ma-apektohan ang publiko sa kadaot nga dala sa haze. (HBL)