PATAY ang usa ka lalaki human gipusil sa iyang igsuon niadtong niaging adlaw sa Purok 9, Sityo Malingon, Barangay Bagongtaas, Valencia City, Bukidnon.
Giila ang biktima nga mao si Ernie Callido, kinsa ang asawa niini niadtong tungora umanakay na kay nagbati.
Sa inisyal nga report sa Valencia City Police Station sa pagpangulo ni Police Lieutenant Colonel Surki Sereñas, nasuta nga kining biktima lango sa ilimnong makahubog dihang naglasong ug gikulata ang igsuong si Eden Calledo lakip ilang amahan nga si Ernesto.
Tungod sa kaulit ni Eden, iyang nahinaykan pagpusil gamit ang improvised shotgun nga maoy miresulta sa kamatayon niini.
"Ingon ana nana siya kung mahubog. Mag amok ug iya ming panghadlukon nga pamatyon," matud sa amahan nga si Ernesto, kinsa dili pa makahukom kung pasakaan ba og kaso ang anak.
Ang iyang asawa sa biktima ang nagbati kamulo dihang nahitabo ang insidente.
Boluntaryo sab nga mitahan sa kapolisan ang suspetsado karong panahona.