UNSA ba gyud kaluwas kan-on kining karneng baboy.
Taliwa niining pagtakboy sa African swine fever nga virus, gipamatud-an ni Benjamin Resma, ang provincial veterinarian sa Misamis Oriental, nga luwas sa maong sakit kining mga baboy nga gipangbuhi sa atong probinsiya.
Niadtong Biyernes, nagpakaon og sinugbang karneng baboy ang Kapitolyo atol sa farmer's market.
Dili kini maoy unang higayon nga giutingkay ang kahimtang sa baboy tungod sa pagdala niini og sakit. Bisan niadtong 1998, nigawas kining swine flu ug daghan mga baboy ang gipanglabay aron kapanalipdan ang panglawas sa mga tawo.
Apan, bisan wala kining African swine fever o mga swine flu nga mitakboy sa baboy, nakahibaw ta kon unsa ang epekto sa pagsige og kaon og karne.
Ambot kon duna bay doktor sa iyang kamatinund-anon nga magtabang sa pasyenti morekomendar pagkaon og karneng baboy niadtong nagpaalim sa ataki sa kasingkasing o kadtong dunay high blood.
Basi sa pagtuon, nasuta baya gyud nga dugay kagaw o bitok kining baboy nga dili gyud mamatay bisan lutuon pag-ayo ang karne. Mabuhi kini sulod sa lawas sa tawo nga maoy momugna og daghang balatian.
Dili malalis nga kining baboy mokaon og bisan unsa. Mao gani gitawag kini og basurahan kay bisan unsang matang sa mahugaw nga butang iya mang kaonon.
Wa man gyud masayop ang Ginoo sa iyang pahimangno, sa Leviticus 11:7, nga dili ipakaon kining baboy. Dunay katuyoan ang Dios sa paghimo sa baboy apan dili aron ikonsumo sa katawhan.
Maoy gusto mahitabo sa Ginoo nga magmalamposon ang mga tawo diha sa iyang paggawi ug sa iyang panglawas. Apan kon atong butangan og makadaot atong lawas, nan, dili na kita makahimaya Kaniya.
Klaro man sa I Corinto 10:31 "Bisan unsa imong pagabuhaton, buhata kana alang sa paghimaya sa Dios." Kon nagkaon ka sa makadaot nga pagkaon, nakahimaya ka ba sa Dios o gipasuwabi nimo ang kahigwaos sa imong gana pagkaon?
Ang problema karon gyud kay bisan atong gobiyerno kuwang man og pagpakabana sa kahimsog sa lawas sa mga tawo.
Kahibaw na sila sa daotang epekto sa pagsige'g kaon og karne, baboy, baka, kanding o unsa pa diha. Apan, usahay gud kinahanglan sab nila suportahan ang industriya sa pagpamuhi og hayop aron molambo ang ekonomiya.
Apan, mas maayo gyud unta nga mopasiugda pud atong gobiyerno og katiguman aron ihan-ay diha ang daotang epekto sa mga karne ug anaa ra unya sa mga tawo kon motuo ba o dili.