GUOT na kaayo ang sitwasyon sa trapiko sa Davao City, di na kini iglayo sa sitwasyon sa kadalanan sa Metro Manila ug sa Cebu City.
Samutan pa ang kaguot sa dagan sa trapiko ning Dakbayan gumikan sa gipahigayong mga road constructions ug cabling installations nga ang sarang naapektuhan ang mga nag-unang mga kadalanan.
Maayo nalang unta kung mahinayon ang planong Davao railway project, lagmit makubsan gamay ang maong problema sa umaabot nga mga panahon.
Kining tanan kabahin lamang sa paglambo sa usa ka siyudad; pero kung dunay paspas nga paglambo unta paspas sab ang plano kung unsay makaalibyo sa problema.
Sa bahin sa City Transport and Traffic Management Office (CTTMO) nga bisan sa ilang mga gihimo nga experimental basis sa traffic flow, di gyod kini mosalir, mosamot na hinuon ang problema kay daghan ang makulgot nga sakyanan, daghan ang malangan.
Gani ang siyudad sa nakalabay nga Agosto napa-implementar niining High-Priority Bus System (HPBS) project; nagpadagan mga bus sa siyudad aron makubsan ang problema, apan karon, daw mao lang man gihapon ang sitwasyon.
Unta kung dunay mga ingon niini nga plano ang gobyerno sa usa ka malambuon nga siyudad sama sa Davao City, padak-an una ang mga kadalanan, mohimo’g mga Skyways, aron masulosyonan ang problema.
Sa laktud, dako ang paglaum sa Dabawenyo nga mahatagan og kasulbaran ang problema sa trapiko ning siyudad sa hinanaling panahon.